Saturday, September 3, 2011


പ്രപഞ്ചത്തിനവകാശികളെന്നപോൽ
ഒരുവരിക്കവിതതേടിയ
ഹൃദയമിന്നൊരു മഷിക്കൂടിൽ..
സംവൽസരങ്ങളുടെ
പിന്നണിയിൽ
നിന്നടർത്തിയൊരിതളിൽ
ഗ്രഹക്കുടുക്കുകൾ
എഴുതിയിടുന്നു
പലതും...
കൂടുതെറ്റിപ്പറക്കും
മേഘങ്ങൾ തൂത്തുമായ്ക്കും
അശോകപ്പൂവിതളിൽ
വിരിയും സന്ധ്യ...
നിറയെപ്പെരുക്കും
ധാന്യമണിപോൽ
മുന്നിൽ തട്ടിതൂവും
അതിഭാവതീവ്രത..
മുന്നിലേയ്ക്ക് വയ്ക്കും
കാൽപ്പദങ്ങളിലുരസും
മുൾപ്പാടുകൾ....
പ്രപഞ്ചത്തിനവകാശികളെന്നപോൽ
ചുറ്റിലും ചങ്ങലയുമായ്
നീങ്ങുമധോലോകമനസ്സുകൾ..
അറിഞ്ഞാലും
എഴുതാനുമെഴുതിനിറയ്ക്കാനുമൊരു
വെൺചുമരെനിക്കുമിരിക്കട്ടെ...
അതുതടയാൻ
നീ ശ്രമപ്പെടുന്നതെന്തിനായ്....

Friday, September 2, 2011


മുദ്ര
ചലനാത്മകമീയോരോ
നിമിഷവും
വ്യവസ്ഥാതീതമാമൊരു
മുദ്ര.....
അകലെ
അനന്തതയിൽ തൊട്ടെഴുതും
ആകാശം..
മനോഹരമീ സംഗീതാത്മകമാം
പ്രഭാതം...
രേഖാങ്കിതം
നിർവചനങ്ങൾ..
ദേശങ്ങളെഴുതും കഥയിൽ
മഴതണുപ്പാർന്ന കനൽ
നെടും പുരതൂണുകളിലെ
നിറം മങ്ങിയ
രൂപശില്പങ്ങളിൽ
ഭൂതകാലത്തിനെഴുത്തുപാടുകൾ
മഴയിൽ കുതിർന്ന
സമുദ്രത്തിലൂടെ നടന്നുനീങ്ങും 
എതിർശേഷിപ്പുകൾ
കൈയിലേറ്റിയ സമുദ്രജലത്തിൽ
ഒരു കടൽചിപ്പി..
മിഴിയിലൊഴുകിയ സമുദ്രത്തിൻ
സ്മൃതിമുദ്ര...



ഋതുക്കൾ കഥയേറെയെഴുതിയിരിക്കുന്നു
ചില്ലെഴുത്തിലുറങ്ങിയിരിക്കുന്നു
ഒരു വ്യസനം....
രണ്ടായിയുടഞ്ഞ
ഭൂമിയുടെയേതു 
മൺതരിയിലാവും
ഒരു കടലുണർന്നത്
ഋതുക്കൾ കഥയേറെയെഴുതിയിരിക്കുന്നു
കൂടുകളിലൊളിപാർക്കും
അതീവസങ്കീർണമാം
നൂലിഴകളിലൊരു
മുത്തുമണിപോൽ
തിരിയും ഗ്രഹപ്പകർച്ചകൾ....
മഴക്കാലമെഴുതിയിടുന്നുവോ
ലോകഭൂപടരേഖയിൽ കുരുങ്ങും 
വിഭജനദൈർഘ്യം.....
ആകാശത്തിനെഴുതാപ്പുറങ്ങളിൽ
എണ്ണിയാലവസാനിക്കാത്ത
നക്ഷത്രങ്ങൾ...
തിരയിലൊഴുകിയൊഴുകി
തീരത്തിൻ ജപമാലയിൽ
സഹസ്രനാമസങ്കീർത്തനമാലപിക്കും
ശംഖുകൾ..
അതിനരികിൽ വർത്തമാനകാലം
തട്ടിതൂവും
സ്മാരകമൺതരികൾ...
സ്മൃതിയിലെ വിസ്മൃതി...

Thursday, September 1, 2011

മഴ തീർഥം തൂവിയ പുലരിയിൽ
മഴ തീർഥം തൂവിയ പുലരിയിൽ
പ്രദീപ്തമാമൊരുണർവിൽ
വിരലിലൊഴുകുന്നു
ഒരു കടൽ.....
ഉറഞ്ഞ മഴമേഘങ്ങളിൽ
നിന്നൊഴുകും മഴതുള്ളികളിലലിഞ്ഞ് 
മുന്നിലേയ്ക്കണയും
വർത്തമാനകാലം...
പെയ്തുമായുന്നുവോ
ഒഴുക്കിന്നോളങ്ങളിൽ
തപമാർന്ന
നിശ്ചലമാമാനിശ്ചലത്വം
മുന്നേറ്റങ്ങളുടെയുടഞ്ഞ
സ്ഫടികതുണ്ടുകളിൽ,
ആരൂഢശിലയിൽ
സത്യാന്വേഷണകഥയിലെ
അർദ്ധവിരാമങ്ങൾ..
ഉടക്കിവലിക്കുമുൾബോധങ്ങളിൽ
ഉറഞ്ഞ മഞ്ഞുപോൽ,
തണുപ്പാർന്ന പ്രഭാതം പോൽ
ഒരു കവിത..
ഒരു മഴനീർക്കണം..



പ്രദക്ഷിണവഴിയിൽ
ഒരിലച്ചീന്തിലൂടെയൊഴുകിമായും
പുലരിതൂവിയ തീർഥം..
വെള്ളിപ്പാത്രങ്ങളിൽ ശേഷിയ്ക്കും
നിവേദ്യത്തിന്നൊരുപൂവ്
സ്വരങ്ങളെ ചേർത്തെഴുതാനാവാതെ
നടന്നുനീങ്ങും പകൽ
പിന്നെയുദാസീനമാമൊരു
സായാഹ്നം തടുത്തുകൂട്ടും
പകൽ വെട്ടം....
ചിന്നിചിതറിയ കൽതുണ്ടുകളിൽ
കടംകഥ കോറാനാവാതെ
നാഴികമണിയുടെ മുഴക്കമായൊതുങ്ങും
നിമിഷങ്ങൾ...
തണുപ്പാർന്ന സായന്തനത്തിൽ
മഴപെയ്തു നിറയും വയലിൽ
നെയ്യാമ്പലേറ്റി നില്ക്കും
ഗ്രാമത്തിനെഴുത്തുപുരയിൽ
വാത്മീകങ്ങൾ പണിയും
സ്മൃതി..
ശീതകാലപ്പുരയിലുറഞ്ഞ
മനസ്സിനരികിൽ,
അമ്പലക്കുളത്തിൻ
കാൽ തെന്നും
പായൽകൽപ്പടിയിൽ,
ഘനീഭവിക്കും
മൃത്യുഞ്ജയത്തിനരികിൽ,
ചുറ്റുവിളക്ക് നിറഞ്ഞുകത്തും
പ്രദക്ഷിണവഴിയിൽ
കാവലായിരിക്കും ദൈവം....



Monday, August 29, 2011


പര്യായങ്ങൾ
ഒലിവിലയിലൊഴുക്കിയ 
കാർമേഘവർണമതിൻ
പേരോ ദയ?
ബാഴ്സിലോണയുടെ
പതാകയുമായോടിയ
ഭാദ്രപദമോ ദയ?
സ്വച്ഛമാം താളുകളിൽ 
ഇന്നെന്തിനെഴുതിയോർമ്മപ്പെടുത്തണം
ദയയുടെ പര്യായങ്ങളെ
മാറിയ ഋതുക്കളുടെചില്ലയിൽ
തണുത്ത ലോകം പോലെ
ദക്ഷിണധ്രുവം പോലെ
ഇടയ്ക്കിടെയെഴുതിയിടാം
ഒരു വശം താഴ്ന്ന തുലാസിൽ
അരുളപ്പാടുകൾ...
പലാശവർണമാർന്ന
ഒലിവിലതളിരിൽ 
നീ തട്ടിതൂവിയ
ഒരുകുടം പ്രതിക്രിയയോ ദയ... 
കരുണാമയനായ ദൈവമേ
ക്ഷമിച്ചാലും
ഇന്നതിനർഥവുമെന്തെന്നറിയാതെ
പോവുന്നു...


ആകാശയാനങ്ങൾക്കരികിൽ
തുമ്പപ്പൂപോൽ വിരിയും
ആകാശയാനങ്ങൾക്കരികിൽ
ഭാദ്രപദമൊരു മുറിവ്
ചന്ദ്രക്കലപോലെവളഞ്ഞ മുറിവ്
അതിനരികിൽ
തീക്കനലിലേക്കിട്ട
ചിത്രശലഭച്ചിറകുകൾ
തേടിവരുന്നതാരോ?
ചുമരെഴുത്തുകൾ ചെരിയുന്നു
ഒരുവശത്തേയ്ക്ക്
ടോറേപെൻഡന്റെഡി പോലെ
ചെരിയും ഗോപുരഭിത്തികളിൽ
ചെരിവുകൂട്ടാനെന്നപോൽ
വീണ്ടും ഒരുവശത്തേയ്ക്ക്
ചെരിയുന്നതാരോ??
ഇമയനങ്ങും നേരം
മുന്നിൽ കണ്ട
അരോചകമാമഹപർവത്തിൽ
നിന്നൊഴുകിയ
ഒരാണ്ടിനിരുണ്ടയിടനാഴിയിലെ
പൊലിപ്പിച്ചൊരു പൊള്ളക്കൂട
ചിത്രശലഭങ്ങൾക്ക് 
ചരമഗീതമെഴുതാനയോഗ്യം..
സ്തുതിപാലകരിൽ 
മയങ്ങിവീഴുമൊരു ഋതു
ഭൂപ്രദിക്ഷണവഴിയിൽ
കാണാത്തതിനാലാകും
ചെരിയുന്ന ഗോപുരങ്ങൾക്കകലെ
സമുദ്രഹൃദയം ഘനരാഗങ്ങൾ 
തേടിയുൾക്കടലിലേയ്ക്കൊഴുകിയത്...





Sunday, August 28, 2011


വീണാതന്ത്രികൾതേടി 
ഇന്നേതുചായമിടും
പുറംചട്ടയിലെന്നോർത്തു
വലഞ്ഞിരിക്കുന്നു
വർത്തമാനകാലം..
കനലെരിയും 
ഉലയിലിത്തിരിയുമിതൂവി
മോടികൂട്ടുന്നുവോ
മാതൃരാജ്യത്തിൻ മൺചെപ്പുകൾ...
ആകാശമേയറിഞ്ഞാലും
അടയാളങ്ങളിലൊഴുകും;
ഉപവസിക്കുമുണ്മയുടെ
മാറ്റുകുറയ്ക്കും
അധികനിറങ്ങളെ..
പ്രളയമുലച്ച വീണാതന്ത്രികൾതേടി 
സമുദ്രമേ!
മുനമ്പിലെത്തിയിരിക്കുന്നു
ഹൃദ്സ്പന്ദനങ്ങൾ..
ഇന്നേത് സ്വരമെഴുതും
രാഗമാലികയിലെന്നോർത്തു
വലഞ്ഞിരിക്കുന്നു ഭൂമിയും...

Saturday, August 27, 2011


മൊഴി
പെയ്യാതെപോയ
മേഘമാർഗത്തിൽ
സന്ധ്യയെഴുതിയതും
പകൽ തട്ടിൽ വീണ
വെളിച്ചത്തിനവസാനരശ്മിയിൽ
നിറഞ്ഞതും നിർമ്മമയായൊരു
നിശബ്ദതയായിരുന്നു
മൂടിക്കെട്ടിയ സായാഹ്നത്തിനും,
ആരവമേറ്റിയ നാൽക്കവലകൾക്കും 
പകൽ വെയിലേറ്റു തളർന്നൊരു
തണൽമരച്ചോട്ടിലൂടെയോടിയ
നിമിഷങ്ങൾക്കും തിരക്കായിരുന്നു
അമ്പലമണികൾക്കരികിൽ
തിരക്കുമറന്നൊരു ഗ്രാമത്തിനോർമ്മയിൽ
വിളക്കേറ്റിയ കൽതട്ടുകളിലൂടെ
പ്രകാശം അരയാൽതറയിലൊരു
പുൽപ്പായയിലിരുന്നെഴുതും
മനസ്സിൽ പൂവായിവിരിഞ്ഞപ്പോൾ
സ്മൃതിയിലൊരുവിസ്മൃതിമുദ്രയേറ്റിനിന്നു
വർത്തമാനകാലം..

Friday, August 26, 2011

ദൂരമളന്ന ചരടിൻതുമ്പിൽ

ഭൂമിയിൽ നിന്നും
ചക്രവാളത്തിലേയ്ക്കുള്ള
ദൂരമളന്ന ചരടിൻതുമ്പിൽ
മിന്നി ഒരു മഴമുത്ത്...
എഴുതിയിട്ട ചൂണ്ടുപലകളിൽ
നിന്നൊരക്ഷരം 
വിരൽതേടിവന്നു
അതിലൊഴുകി
കുളിർന്ന മണ്ണിൻ സുഗന്ധം
ആവർത്തനവിരസമെങ്കിലൂം
ആന്ദോളനങ്ങളിൽ നിറഞ്ഞു
സുഗന്ധവ്യജ്ഞനങ്ങളുടെ
ഗന്ധം...
തട്ടിതൂവിയിട്ട
വെയിലിനരികിൽ
സപ്പോർട്ടമരങ്ങൾ..
തണൽതേടിയോടിയ
സായാഹ്നം മറന്നിട്ട
പകലിൻ ദൂരമളന്നുതീർത്ത
സന്ധ്യാവിളക്കിലും
മിന്നി ഒരു മഴമുത്ത്....