സ്വരം
നാലുമടക്കിൽ ലോകം
ആർക്കോ വേണ്ടി
ചുരുട്ടിക്കെടുത്തിക്കൊണ്ടേയിരിക്കുന്നു
ആത്മാവിന്റെ ഒരിറ്റു പ്രകാശം
കൂട്ടിപ്പെരുക്കിയ
ഗണിതസംഖ്യയിലേക്ക്
ഋണക്കൂട്ടുകളുടെ
ഒറ്റസംഖ്യകളെറിയുന്നു
യുദ്ധം കണ്ടുമതിയാവാത്ത
ചിലേ മനസ്സുകൾ
അടർക്കളത്തിൽ തുളുമ്പിവീണ
അതിർതർക്കത്തിന്റെ
ചില്ലുതരികൾ
വീണു മുറിഞ്ഞ വിരലിനിന്നും
നോവിന്റെ നീറ്റൽ
ഇഴതെറ്റിയ നിമിഷങ്ങളിൽ
ഉച്ചനേരത്തു പെയ്ത
മഴയിൽ തൊട്ടെഴുതിയ
ഒരുണർത്തുപാട്ടിലൂടെ
സായാഹ്നം മിഴിതുറന്നു...
സമുദ്രം ചക്രവാളത്തിനരികിൽ
കവിതയുടെയീണമാകുമ്പോൾ
ഒരു സ്വരം ഹൃദയത്തിന്റെ
വീണയിൽ മന്ത്ര മാകുന്നു
ആരവമില്ലാത്ത
കടലിനിതളിൽ
ഒരു നക്ഷത്രം കവിതയെഴുതി
No comments:
Post a Comment