മഴതുള്ളികൾ
 
എന്നേ ത്രികാലങ്ങളൊന്നിൽ
നിന്നും പുലർവർണ്ണങ്ങൾ
ഭാഗപത്രങ്ങളടർത്തിയീ
മണ്ണിൽ കുളിർന്ന മഴതുള്ളി
ചാലിച്ചു ഭംഗിയിൽ
തീർത്തു കമാനങ്ങളായിരം
പണ്ടേ കൊഴിഞ്ഞ പകൽചിന്തിലെ
നിഴൽതുണ്ടുകൾ മാഞ്ഞു
നിറം മങ്ങിയോർമ്മകൾ
ചന്ദനക്കാപ്പിൽ മറഞ്ഞു
പ്രദക്ഷിണക്കൽവരിക്കെട്ടിൽ
നിന്നാദിതാളം ശ്രവിച്ചെന്നേ
യുഗങ്ങൾ മയങ്ങി
കനൽക്കൂട്ടിലൊന്നിൽ നിറഞ്ഞു
പ്രദോക്ഷസന്ധ്യാജപം
ഒന്നായുഴിഞ്ഞുതീരാത്ത
മന്ത്രങ്ങളിലൊന്നിൽ
തിരിഞ്ഞുഭൂകാവ്യങ്ങൾ
പിന്നെയും വന്നുപോയെത്ര
ഋതുക്കൾ മഹാവേദമന്ത്രങ്ങളിൽ
നിന്നുണർന്നു ഹൃദ്സ്പന്ദങ്ങളിന്നീ
മനസ്സിൽ കുളിർന്നു പെയ്യും
മഴതുള്ളിയിൽ പൂക്കുന്നു
ഭൂരാഗമാലിക...