മഴതുള്ളിക്കവിത

മൺപാത്രങ്ങളിലൊതുങ്ങാതെ
മാനത്തുനിന്നൂർന്നിറങ്ങിയ
മഴപോലെയൊരു സ്വപ്നം
ഞാനിന്നും കണ്ടു
ഋതുക്കളുടെ പുടവചുറ്റി
മാഞ്ചുവട്ടിലിരുന്ന് ഗ്രാമത്തെ
മിഴിയിലാക്കിയെന്റെ
വിരൽ തുമ്പിൽ വന്നിരുന്ന്
തുള്ളിതുള്ളിതുടങ്ങിയാഘോഷമായ്
പെയ്ത ഞാറ്റുവേലമഴപോലെയൊരു
സ്വപ്നം...
തുളസിക്കതിരിറ്റുവീണ
നനഞ്ഞ മണ്ണിലിത്തിരിപ്പോന്ന
പുൽനാമ്പുകളെയുരുമ്മി
പെയ്ത മഴയെ മൂടാനൊരു
കുട തേടാത്ത ഗ്രാമത്തിനരികിലൂടെ
പെയതൊഴുകിയ മഴയിലൂടെ
ഭൂമിയോടൊപ്പം ഞാനും നടന്നു..
മഴപെയ്യാനിതുമഴക്കാലമല്ലെന്ന്
സ്വപ്നത്തിനെങ്ങനെയറിയാൻ....
സ്വപ്നത്തിലുണർന്നുവന്നതുമൊരു
മഴതുള്ളിക്കവിത...