അങ്ങനെ നടക്കാനുമൊരു സുഖമുണ്ടാവും
 ഒരിയ്ക്കൽ കണ്ടിരുന്നു
കാച്ചിക്കുറുക്കിയാറ്റിയൊരു
പൊൻചഷകത്തിലൊഴുകിയ
കയ്പും മധുരവും...
തുള്ളിതുള്ളിതുളുമ്പിതുളുമ്പി
അതിലിപ്പോഴുള്ളതിത്തിരിയടിമട്ട്
ഒരുമഴക്കാലത്തിലേയ്ക്കാപാത്രമെടുത്തു
നീട്ടിയാൽ പിന്നെയതും ബാക്കിയുണ്ടാവില്ല
കഴുകിതുടച്ചുവൃത്തിയാക്കേണ്ട
ആവശ്യകതയേയുണ്ടാവുള്ളൂ
അലട്ടില്ലാതെയങ്കലാപ്പില്ലാതെ
പിന്നീടങ്ങനെ നടക്കാം
ഋതുക്കൾക്കൊപ്പം
ശരത്ക്കാലനിറങ്ങളിൽ മുങ്ങിയങ്ങനെ
സായം സന്ധ്യയുടെ വിളക്കുമേന്തി
ചക്രവാളത്തെതൊടും കടലിനരികിൽ
കടലോരമണലിലൂടെയങ്ങനെനടക്കാം
കാച്ചിക്കുറുക്കിയാറ്റിയ സർഗങ്ങളിൽ നിന്നൊഴുകും
കടലിന്റെയാരവത്തിനിടയിലൂടെയങ്ങനെ
നടക്കാനുമൊരു സുഖമുണ്ടാവും...