SATURDAY 21, 2014
IST 4.05 PM
അതിരുകൾക്കുള്ളിലായ് ചുമരുകൾ
വളർന്നേറിയൊരു ദിഗന്തത്തെ പകുത്തുനീങ്ങീടുന്നു
അരികിലെ സംസ്കൃതികളൊരുയുദ്ധയാനത്തിലതിരുകൾ
തകർത്തേറിയൊഴുകിടുന്നു
കനലിൽ നീറ്റി കടം കഥയായി മാറിയോരറിവുകൾ
മുന്നിൽ തിളങ്ങിടുന്നു.
വെയിലുമായും മഴക്കാടുകൾക്കുള്ളിലായ്
കദനങ്ങൾ നീർച്ചോലയായിടുന്നു
ഋതുഭേദമതുപോലെ രാജ്യവും മാറുന്ന
വഴിയിലായ് ധ്വജചിത്രകൗതുകങ്ങൾ
മിഴിയിലെ ചിത്രപടങ്ങളിൽ നിന്നുണർന്നൊഴുകുന്ന
കടലുകൾ, കാവ്യങ്ങളും
പലതിരിയിട്ടുതിളങ്ങും വിളക്കിലായുണരുന്ന
ജീവസ്വരങ്ങൾ പോലെ
വിരലിലെ വിസ്മൃതിക്കൂടുലച്ചെത്തുന്ന
ജനകരാഗങ്ങളും ലയഭേദവും
അതിദ്രുതവിസ്മയമതിലേറിയെത്തുന്ന
ദിനതാണ്ഡവങ്ങളും, വാദ്യങ്ങളും
പഴയതാണെങ്കിലും പണ്ടേ മനസ്സിന്റെ
കവിതയിൽ ഹൃദയമുണർന്നിടുന്നു.
മൊഴിയിലെ മർമ്മരം പോലെയപരാഹ്നവഴിയിൽ
തണുക്കുന്നു സങ്കടങ്ങൾ
പുതിയ ഗ്രാമം കനൽക്കെട്ടഴിച്ചറിവിന്റെയൊരു
വേദഭാഗമായ് മാറിടുന്നു.
മതിലുകൾക്കുള്ളിലെ മാറ്റൊലിയിലെവിടെയോ
നിമിഷങ്ങളിടവേളയായിടുന്നു
പവിഴമല്ലിപ്പൂവടർത്തിനീങ്ങും മഴയ്ക്കെഴുതവാനൊരു
ഭൂമിയൊഴുകുവാനൊരു കടൽ...
June 1, 2014
IST 10.09 AM
Sunday
ജാലകവാതിൽക്കലായ് മഴത്തുള്ളികൾ,
വർഷശീലുകൾ പാടി ഗ്രാമമുണരുന്നരികിലായ്
പുലർകാലത്തിൻ നിലവിളക്കാം പ്രകാശവും,
പ്രകൃതിയുണരുന്ന ഹരിതവനങ്ങളും
മഴതന്നിതളിലായ് പകൽ തൂവീടും
സ്വർണ്ണനിറവും, കനൽചെപ്പിലുറങ്ങും കവിതയും
അരയാൽത്തറയിലായൊരു വാത്മീകം തീർത്ത
കദനങ്ങളെ മായ്ച്ചുനീങ്ങുന്ന ദിനങ്ങളും
രഥങ്ങളേറി, ധ്വജചിഹ്നങ്ങളേറ്റി മിഴിയ്ക്കരികിൽ
ഋതുക്കളും നടന്നു നീങ്ങീടുന്നു
മൃദുഭാവത്തിൻ നേർത്ത കസവിൽ തുന്നും
കാവ്യമതിലെ നൈർമല്യത്തിൽ മനസ്സുമുണരുന്നു
എഴുതിയൊരു തപാൽ മുദ്രയിൽ തുടുക്കുന്ന
പഴയലോകത്തിന്റെ പവിത്രസ്പന്ദങ്ങളിൽ
നടപ്പാതകളേറി ഗോപുരമുകളിലെ ഗ്രഹചെപ്പുകൾ
തുറന്നെത്തുന്ന യന്ത്രസ്പർശം
ഇടവേളകൾ വേദഭാവങ്ങൾ കടന്നേറിയൊഴുകുന്നൊരു
മഹായാനത്തിൻ തത്വങ്ങളായ്
ചുരുങ്ങും വിശ്വാസങ്ങളെടുത്തുസൂക്ഷിക്കുന്ന
മതിൽക്കെട്ടുകൾകള്ളിൽ നിർജ്ജീവശിലകളിൽ
ഹൃദയസ്പർശങ്ങളേ കാവ്യാത്മഭാവത്തിന്റെയുടുക്കിൽ
തുടികൊട്ടിയുണർത്താം ഭൂപാളങ്ങൾ
അരികിൽ മഴക്കാലമെഴുതും തീരങ്ങളിൽ
ഒഴുകും കടൽശംഖിൻ നിഗൂഢസ്വരങ്ങളിൽ
എഴുതും പ്രഭാതമേയെത്രമേൽ പ്രകാശിതമിവിടെ
തിളങ്ങുമെൻ മൺ വിളക്കുകൾ,
മഴയെഴുതി നിറയുന്ന സമുദ്രമുനമ്പുകൾ
April 15, 2014
IST 11.42 AM
Tuesday
ചൈത്രസ്പർശം
വിടരും പൂക്കൾ ചൈത്രമൊഴിയിൽ നിന്നും
വിളക്കെടുത്തുവരുന്നോരു പൂർവാഹ്നതീരങ്ങളിൽ
പവിഴമല്ലിത്തുമ്പിലൊരുനാളെഴുതിയ
പഴയകവിതകൾ തിളങ്ങീടുന്നു മുന്നിൽ
ഒരിക്കൽ വേനൽക്കാലമഴയിൽ ഗ്രാമം തീർത്ത
മണിച്ചെപ്പിലായ് പെയ്ത കവിതാസ്പന്ദം പോലെ
മനസ്സതിലെ പ്രദീപ്തമാം പ്രകാശഭാവം
വീണ്ടുമൊരു നൗകയിൽ ലോകചിത്രങ്ങൾ കണ്ടീടുന്നു
ഉടഞ്ഞ ഭൂഖണ്ഡങ്ങളുപദ്വീപുകൾ പിന്നെയരികിൽ
അറയ്ക്കുള്ളിൽ വിതുമ്പും ഹൃദയവും
എഴുതി, പലേയുഗഭാവങ്ങളുറങ്ങുന്നോരിതിഹാസങ്ങൾ
പഠിച്ചൊടുവിൽ തപസ്സിന്റെ പർണ്ണശാലയയിൽ
ജപമൊഴുകും ആരണ്യകഹരിതസ്പർശങ്ങളിൽ
പ്രകൃതിയൊരുക്കുന്ന കണിയിൽ, പൊൻ താലങ്ങളെടുത്തു
നിന്നീടുന്ന പൂർവസന്ധ്യകൾക്കുള്ളിൽ
മനസ്സേ വീണ്ടും സ്വരഭാവങ്ങളതിൽ നിന്നുമൊരുക്കാം
അപൂർവമാമൊരു സങ്കല്പത്തിൻ സർഗം...
April 11, 2014
IST 12.15 AM
Friday
മിഴിയിലെ ഗ്രാമം പുരാണങ്ങളാകുന്നു
പഴയ സർഗങ്ങളിൽ മഴപെയ്തുകുളിരുന്നു
അരികിലൊരു മന്ത്രഭാവം ചുറ്റി മനസ്സിന്റെ
അതിഗൂഢഭാവങ്ങൾ ലോകങ്ങളേറുന്നു
വഴിയിലെ തണൽ മരച്ചില്ലയിൽ വേനലിൻ
ശിഖരങ്ങളെല്ലാം കനൽതൂവിനിൽക്കുന്നു
നിമിഷങ്ങളിൽ തട്ടി വീണുടഞ്ഞൊഴുകുന്ന
തിരകൾക്കുമപ്പുറം ദ്വീപുകൾ പാടുന്നു
എഴുതി മായ്ക്കുന്നോരു തീരങ്ങളിൽ
കടൽക്കനവുകൾ ശംഖിലെ ശ്രുതിയായി മാറുന്നു
ഒരു വ്യോമയാനം മറഞ്ഞൊരാകാശത്തിനരികിൽ
നിന്നും കടൽ യാത്രയായീടുന്നു
അറിയാതെയെത്രയോ സംവൽസരങ്ങളിൽ
ഗ്രഹമൊഴിയിൽ നിന്നങ്ങടർന്ന ദിനങ്ങളും
കനകാംബരങ്ങൾ വിടർന്നപ്രഭാതത്തിനരികിലെ
അഗ്നിദീപങ്ങളും മുദ്രയും
ഹൃദയത്തിലൗഷധക്കൂട്ടുമായൊഴുകുന്ന
കവിതയും കല്പകാലത്തിന്റെയോർമ്മയും
ഒരു പദത്തിൽ നിന്നു ഗ്രാമം രചിക്കുന്ന
ഘനശ്യാമശിലയിലെ സുപ്രഭാത്രങ്ങളും
വഴിയിലെങ്ങോ വരിക്കല്ലുകൾ തെറ്റിവീണെഴുതാൻ
മറന്ന പ്രപഞ്ചസ്വരങ്ങളും
അരികിൽ പ്രദക്ഷിണവഴിക്കുള്ളിലായ്
തിരിഞ്ഞൊടുവിലൊരു ജപമാലയായി മാറീടുന്നു..
March 13, 2014
IST 10.18 AM
Thursday
ഇവിടെയീ പൂർവസന്ധ്യകൾക്കുള്ളിൽ,
ഇതൾ വിടർത്തുന്ന പൂവുകൾക്കുള്ളിൽ
നഗരമുദ്യാനവാതിൽ തുറന്ന്
മൃദുപദങ്ങളുണർത്തുന്നു വീണ്ടും
ചുമരുകൾ നിറഞ്ഞാകെ വിങ്ങുന്നു
കിളികൾ ഗ്രാമങ്ങൾ തേടിനീങ്ങുന്നു
അനുസ്വരങ്ങളായാന്ദോളനത്തിൻ
ഹൃദയഭാഷയിൽ സാഗരഗാനം
അരികിലെ യാത്രാനൗകകളൊന്നിൽ
അതി നിഗൂഢമാം ആകാശസ്പന്ദം
അരികിൽ മാഞ്ഞൊരു വ്യോമയാനത്തിൻ
ദിനമതിൻ ശോകസ്പന്ദങ്ങൾ ചുറ്റും
മിഴിയൊഴിഞ്ഞോരു കണ്ണുനീരുപ്പിൽ
കടലുകൾ കടഞ്ഞീടുന്നു മൊഴികൾ
എഴുതി നിങ്ങുന്ന മനസ്സിന്റെ സ്പർശം
വിരലിനുള്ളിൽ വിതുമ്പുന്നു വീണ്ടും
മഴയിഴയിലായൊഴുകിതളിർത്ത
പവിഴമല്ലികൾ, ദേവദാരുക്കൾ
ഹൃദയഭാവങ്ങളേറ്റുന്ന ശംഖിൽ
പ്രണവസ്പന്ദം തുടുക്കുന്നു വീണ്ടും
കഥയിലെത്ര മിഴാവുകൾ, ഹൃത്തിൻ
ശ്രുതിയിലെത്ര പ്രദോഷമന്ത്രങ്ങൾ
March 7, 2014
IST 8.45 PM
Thursday
ദിനങ്ങളിൽ നിന്നുമടർന്നുവീഴുന്ന
ദലങ്ങളിലൊരു സ്മൃതി
പുലർകാലമൃദുലഭാവങ്ങൾ
മനസ്സിലേറ്റുന്ന മൊഴിയതിനുള്ളിൽ
മഴനീർത്തുള്ളികൾ
മിഴിയിലെ ശോകമൊരു കാവ്യഭാവം
സമുദ്രസങ്കല്പമൊരു കടംകഥ
പലതീരങ്ങളിൽ കടൽച്ചിപ്പിതേടി
നടന്ന ബാല്യമിന്നുടഞ്ഞു ഗ്രാമത്തിൻ
കറുകപ്പുല്ലുകൾ കദനമേറ്റുന്നു
വയൽപ്പകലുകൾ ഹരിതാഭമതിൻ
ഹൃദയസ്പന്ദങ്ങൾ പഴയ ഗാനങ്ങൾ
നിരനിരയായി നഗരമേറുന്ന
പ്രതിഭാവങ്ങളും, പ്രകമ്പനങ്ങളും
മനസ്സിലെ ഗ്രാമം നഗരത്തിലെത്തി
കവിതയാലൊരു കനവുകാണുന്നു
പലദിഗന്തങ്ങളതിരിലേറുന്ന
കനലുകൾ കണ്ടു മിഴിയടയ്ക്കുന്നു
വഴിയൊഴുകിയിന്നൊരുമുനമ്പിന്റെ
ശിലകളിൽ ധ്യാനജപമെഴുതുന്നു
ഇലയനക്കങ്ങൾ സ്വരമുണർത്തുന്ന
പുലർകാലത്തിന്റെ പ്രഥമമന്ത്രങ്ങൾ
ഒരു മഴക്കാലമതിനുള്ളിലെത്ര
കടലുകൾ, കടുംതുടികൾ, ശംഖുകൾ
കടൽത്തീരത്തിന്റെ കദനഭാവങ്ങൾ
കടം കൊണ്ടു നിൽക്കുമഴിമുഖങ്ങളും
നിറം തീർന്നു ശുഭ്രമൊഴിയായി നിൽക്കും
പുലർകാലവ്യോമഹൃദയസ്പന്ദങ്ങൾ
കദനമാകവെയലിഞ്ഞുതീരുന്ന
മൊഴിപകർത്തുന്ന പവിഴമല്ലിയും
പടിപ്പുരയൊരു പ്രപഞ്ചഗോപുരം
ഉഷസന്ധ്യയൊരു പ്രദക്ഷിണവഴി
March 6, 2014
IST 11.14 PM
Thursday
നനുത്ത സന്ധ്യകൾ തിരിതെളിയ്ക്കുമീ-
വഴിയിലെ ഗ്രാമമുറങ്ങി, തേർത്തട്ടിലൊഴുകി
കാവ്യത്തിൻ പുരാണഭാവങ്ങൾ
വിരൽത്തുടിയിലായെടുത്തുസൂക്ഷിച്ചോരിതളുകൾ
വാനമെഴുതിസൂക്ഷിച്ച ദിഗന്തഭാവങ്ങൾ
വ്യഥിതചിന്തകൾക്കൊടുവിലായ്
മഴയ്ക്കഴകുതീർത്തോരു സമുദ്രശംഖുകൾ
ശിലാതലങ്ങളിൽ ശിഖരങ്ങൾ പോലെ
പറന്നുനീങ്ങുന്നു ദിനങ്ങളെത്രയോ
മിഴിനീരിനുപ്പിൽ കടലുറയുന്നു
മൊഴിയിലക്ഷരം കവിതയാകുന്നു
സ്മൃതിയുടഞ്ഞൊരു മണൽത്തീരത്തിലായ്
പകലുകൾ കടന്നൊഴുകിമായുന്നു
തിരികൾ താഴ്ത്തിയ പകലിന്റെവ്യോമ
ഗതിയിലായ് മിന്നും നനുത്ത സന്ധ്യകൾ
നിലവിളക്കുകൾക്കരികിലായ് നേർത്തുവരുന്ന
ഗ്രാമത്തിൻ ഹൃദയസ്പന്ദങ്ങൾ
ഒരു സോപാനത്തിനിടക്കയിൽതുടിയിടുന്ന
ഗ്രാമത്തിൻ ഹൃദയഗാനങ്ങൾ..
February 20, 2014
IST 10.19 AM
Thursday
ജപമാലകൾ
പ്രഭാതമൊരു ദീപ്തബിന്ദുവായ്
പ്രകാശമായുണർത്തുപാട്ടായ് മുന്നിൽ
സാധകം ചെയ്തീടവെ
ഉണരാൻ വൈകും ശുഭ്രഗാനമേ സമുദ്രത്തിൻ
ഖനിയിൽ നിന്നും കടഞ്ഞടുക്കാമൊരു സ്വരം
മിഴിതൊട്ടെഴുതിയ പൂർവചിത്രങ്ങൾക്കുള്ളിൽ
മൊഴിയായൊഴുകുന്നു ശംഖുകൾ, നക്ഷത്രങ്ങൾ
പലനാളുകൾ ചുറ്റിയൊടുവിലതിരിരിട്ട
മതിലിൽ പടർന്നേറി മായുന്ന ഋതുക്കളും
മിഴിനീരൊഴുക്കിയ മഴക്കാലത്തിൻ നേർത്ത വ്യഥയും
കാലത്തിന്റെ കല്പനാദലങ്ങളും
ദേവദാരുക്കളിതൾ പൊഴിക്കും കാവ്യത്തിന്റെ
ശോകമായ് നിന്നീടുന്ന പ്രാചീനസത്യങ്ങളും
ശ്രുതിയിട്ടുണരുന്ന വീണയിൽനിന്നും തെറ്റിയുടഞ്ഞു
തകർന്നൊരു പ്രാർഥനാമന്ത്രങ്ങളും
ജപമാലകൾക്കുള്ളിൽ തിരിയും ലോകത്തിന്റെയിതളിൽ
ഹൃദയമേ കാവ്യങ്ങൾ രചിച്ചാലും..
February 19, 2014
IST 10.48 AM
യുഗത്തിരിവുകൾ
ഒരുനാൾ ഋതുക്കളെ ചുറ്റിയോടിയ
രഥമതിലായ് കണ്ടു ഭൂപാളത്തിന്റെ സ്വരങ്ങളെ
ഇലച്ചാർത്തുകൾ പർണ്ണശാലകളായി
തീർഥമൊഴുകും കമണ്ഡലു ജപമന്ത്രങ്ങൾ ചൊല്ലി
തുളസിപ്പൂക്കൾ ചൂടി പ്രകൃതിയുണർന്നോരു
തുളസീവനങ്ങളിൽ സ്മൃതിതീർത്തൊരു ചിത്രം
വഴിയിൽ യുഗങ്ങളോ പിറകോട്ടോടി
കൃതയുഗമായ് നിന്നു യജ്ഞവേദഭാഗങ്ങൾ മുന്നിൽ
നിമിഷങ്ങളിൽ തട്ടിയുടഞ്ഞ പ്രളയാന്ത്യമതിന്റെ-
അരികിലായ് കോസലമുണർന്നുവോ
മിഴിയിലൊഴുകിയ ദ്വാപരം യുഗാന്ത്യത്തിനൊടുവിൽ
സമുദ്രത്തിനലയിലലിഞ്ഞുപോയ്
അനന്തസമുദ്രങ്ങൾക്കരികിൽ നിന്നും
മുനമ്പൊരു ശംഖിലെ നേർത്തസ്വരമായ് മാറുന്നേരം
അരികിലൊരു യുഗം കറുപ്പാർന്നൊരു ചേലയെടുത്തു
മുഖം മറച്ചെഴുതും ചിത്രങ്ങളിൽ
കലിസംഖ്യകൾ കണ്ടു നടുങ്ങും മനസ്സിന്റെയിതളിൽ
സരസ്വതി മന്ത്രവീണമീട്ടുന്നു
ഹൃദയതന്ത്രിക്കുള്ളിലുണരും സ്വരങ്ങളെ
മനസ്സിൽ തീർഥസ്നാനം ചെയ്യുന്ന സ്വപ്നങ്ങളെ
വിരൽതുമ്പിലെ വിസ്മയങ്ങളെയെടുത്തൊരു
കവിതയ്ക്കുള്ളിൽ ചേർത്തുഭദ്രമായ് സൂക്ഷിക്കുക..
ഓർമ്മകളുറങ്ങട്ടെയിനിയും
ഋണപ്പാടിനീണങ്ങൾ
പാടിവരും
ദിനങ്ങൾ മാഞ്ഞീടട്ടെ
എഴുതി തുന്നി
പലേയിടവും
മുറിഞ്ഞാകെയരികിൽ
നടന്നകന്നെത്ര
ഋതുക്കൾ
മിഴിപൂട്ടിയുറങ്ങും
മനസ്സൊരു ശരശയ്യയിൽ
ശരറാന്തലിൻ
പ്രകാശം പോൽ
നക്ഷത്രവിളക്കുകൾ
മതിലിനരികിലായെത്രയോ
പുരാണങ്ങൾ
മൊഴിയിൽ തട്ടിത്തടഞ്ഞുലയും
യാമങ്ങളും
ഇനിയേതുഷസ്സിനെയുടച്ചു
നൈവേദ്യത്തിനുരുളിക്കുള്ളിൽ
തീയിട്ടുരുക്കിയൊഴുക്കണം
മറന്നുതീരേണ്ടത്
മറക്കാതിരിക്കുവാൻ
മറവിൽ നിന്നും
ധനുസ്സെടുക്കും കാലം
പഴേയഴികൾ മറന്നുതീർന്നുറങ്ങും
ഭൂമി,യഴിമുഖങ്ങളതിൽ
നിന്നുമകലും
സമുദ്രവും
സ്മൃതിയിലദൃശ്യമാം
സങ്കല്പഭാവങ്ങളേ
വിസ്മൃതിതൻ
ഋണങ്ങളുമുറഞ്ഞുമാഞ്ഞീടുന്നു.
അനഘഹൃദയവുമതിന്റെ
സ്പന്ദങ്ങളിൽ
പുനർജനിക്കും
കാവ്യഭാവവും ഭൂകല്പവും
തിരികെ നടക്കുന്ന
തീരഭൂവിലായ്
ശാന്തമൊരു സ്വപ്നവുമതിൻ
നക്ഷത്രദീപങ്ങളും... 
