മഴ

പെയ്തുതോരാത്ത മഴയ്ക്കെന്തു
ഭംഗിയാണിന്നുമീ ഗ്രാമം
നടന്നുനീങ്ങും വഴിയൊന്നിലായ്
വീണ്ടും ചുരുങ്ങുന്നു ലോകവും
പെയ്തുതോരാത്ത മഴയ്ക്കെന്തു
ഭംഗിയാണിന്നുമീഹൃദ്സ്പന്ദനത്തിൽ
നിന്നൂറുന്നതെന്നും മഴക്കാലഗാനങ്ങളാലില
ചില്ലയിൽ തുള്ളിവീഴും മഴതുള്ളികൾ

കണ്ടുനിറഞ്ഞുതീരാത്ത പ്രപഞ്ചമേ
കൺകളിൽ നിന്നുമകന്നുനീങ്ങും
ഗ്രഹദൈന്യങ്ങൾ തുള്ളിയാടും
നാലുകെട്ടിലെ മന്ത്രങ്ങൾ തേടി
പഴേ വിധി ചില്ലുകൾ
കൈവിരൽതുമ്പിലെ നോവായി
മാറിയോരിന്നലെകൾ
മാഞ്ഞു തീർന്നതും വീണ്ടുമീ
മൺതരിക്കുള്ളിൽ മഴതുള്ളി
വീഴുന്ന ഗന്ധവും കാവ്യമായ്
തീരുന്ന സന്ധ്യയിൽ
കാലത്തിനപ്പുറം ചക്രവാളത്തിന്റെ
തേരിലോടുന്നുവോ
നക്ഷത്രകൗതുകം