മഴ

മഴതൂവുന്നു തീർഥകണങ്ങൾ വീണ്ടും
പുകഞ്ഞെരിഞ്ഞു
കരിഞ്ഞൊരീയുദ്ധ്യാനഗാനങ്ങളിൽ
മഴതൂവുന്നു വീണ്ടുമമൃതകണം
വിരൽതുടിയിൽ നിന്നും
കടലുയരുന്നരികിലായ്..

മഴതൂവുന്നു സായാഹ്നത്തിന്റെ
സങ്കല്പങ്ങൾ
മഴയിൽ തുടുക്കുന്നു മനസ്സിൻ
വീണാതന്ത്രിയതിന്റെ
സ്വരങ്ങളിലുണരുന്നുവോ ഭൂമി

ഇടവേളകൾ മഴക്കാലങ്ങൾക്കിടയിലായ്
അലിഞ്ഞു തീർന്നു
പിന്നേ ശേഷിച്ചു സായന്തനം
മഴയ്ക്കുള്ളിലെ മന്ത്രജപം
കേട്ടുണർന്നൊരീ ഹൃദയസ്പന്ദങ്ങളിൽ
നിറയും ഭൂരാഗങ്ങൾ..

മഴക്കാലമേ ചിലമ്പൊലിപോൽ
തുള്ളിതൂവി മനസ്സിൽ
പെയ്താലുമീ ചില്ലുകൂടിനുള്ളിലെ
സ്വരങ്ങൾക്കതിനെന്തുഭംഗിയാണിന്നീ
മഴയതിന്റെ ലയം
ഹൃദ്സ്പന്ദനത്തിൻ ജീവസ്വരം.....