ഹൃദ്സ്പന്ദനങ്ങൾ
ആകാശത്തിനൊരിതളിൽ
തിളങ്ങിയ നക്ഷത്രമേ
എഴുതിമുഴുമിപ്പിക്കാനാവാത്ത
ഹൃദ്സ്പന്ദനങ്ങളേ
മഴക്കാലത്തിൽ കുളിർന്ന
മനോഹരമിമുദ്യാനനഗരത്തിലിരുന്ന്
നമുക്കെഴുതാം വീണ്ടും..
ചുറ്റുവലയങ്ങൾ
തുരുമ്പുവീഴ്ത്തിയ
വിരൽതുമ്പിൽ
മഴതുള്ളിയാൽ കടഞ്ഞ
അമൃതുതൂവി
മനസ്സിലെ ശൂന്യതിയിൽ
പുനർജനിയുടെ
മൃതസഞ്ജീവനിമന്ത്രം
ചൊല്ലിയുണർത്താം
മരണപ്പെട്ടുപ്പോയ
മനോഹരപദങ്ങളെ..
ദർപ്പണങ്ങളിൽ വീണുടഞ്ഞ
മൺ വിളക്കുകൾ
വീണ്ടും ചേർത്തു സന്ധ്യയുടെ
സ്പന്ദനലയമാക്കാം
വിളിപ്പാടകലെ
ഭൂമിയുടെ മൃദുസ്പർശത്തിൽ,
മൺ തരികളിൽ,
സമുദ്രരാഗങ്ങളിൽ
തൊട്ടുതൊട്ടെഴുതാം
ചുറ്റമ്പലത്തിൽ
കൽത്തേരിലേറ്റിയ പ്രതിമകളിൽ
ജീവനുണരും വരെയും
പവിഴമല്ലിയിതളുകളിൽ
നമുക്കെഴുതാം...
No comments:
Post a Comment