നിറഞ്ഞൊഴുകും കടൽ

ശംഖിനുള്ളിലൊഴുകിയ
കടലുണർത്തിയതൊരു
ഘനരാഗം
ഒതുക്കിയിട്ടുമൊതുക്കിയിട്ടും
അതൊഴുകുന്നു
ചക്രവാളത്തോളമെത്തിയ
സന്ധ്യപോലെ
പിന്നെ തൊടുകുറിയിട്ടു
ശീവേലിപ്പുരയിലിരുന്ന്
കേട്ടു പാണി
തൂവിയ ബലിക്കല്ലുകളിൽ
ജീവനുണർന്നുവോ
പുല്ലുമെടഞ്ഞ പായയിലിരുന്നല്പം
പഴംപുരാണമെഴുതും
നാരായങ്ങളിൽ നിന്നുർന്നിറങ്ങിയ
വാക്യർഥങ്ങളിൽ
വീണുടഞ്ഞൊതൊരുപിടിയോർമ്മ
പിന്നെയുമതിനെയുറക്കാനൊരു
താരാട്ടുമായ് തിരക്കിട്ട് തിടമ്പേറിവരും
വിവർത്തനാക്ഷരമേളം....
നിറഞ്ഞൊഴുകും കടലേ
കാർമേഘങ്ങളുലഞ്ഞ്
മഴപെയ്യുമ്പോൾ
മനസ്സിലെ ശംഖിലേയ്ക്കായ്
കേൾക്കാനിമ്പമുള്ളൊരു
ഘനരാഗം കൂടി തരിക....