Sunday, April 10, 2011

കടലേറും ശംഖ് 

ഒരിയ്ക്കൽ ചിന്തകളെയെല്ലാം
കടിഞ്ഞാണിട്ടു പൂട്ടിവച്ചിരുന്നു
ഓർമ്മതെറ്റുകളെ കടന്നൊരു
യാത്രപോയതുമന്നുതന്നെ
ഇനിയിപ്പോൾ
ഭൂതഭവിഷ്യവർത്തമാനങ്ങളെയൊരു
പകലിലാക്കി വ്യസനിക്കേണ്ടതില്ലല്ലോ...
ചില ഋതുക്കളോർമ്മിക്കാൻ
സുഖകരമായൊരോർമ്മചിന്തുകൾ തന്നുപോകും
ചിലവയരികിലെത്തി വിലങ്ങിട്ടുചുറ്റി
സർവനാശത്തിന്റെ
എഴുത്തുപത്രങ്ങളേകി പോകും..
രണ്ടിനുമിടയിലൂടെ നടക്കാനിന്നിഷ്ടം...
പഴിചാരിയൊഴുകി മായും
പുഴപോലെയല്ലല്ലോ കടൽ
ആകാശം പൂവിടുന്നതിപ്പോൾ
വിരലുകളിൽ...
ചിലനേരം നക്ഷത്രങ്ങളുമവിടെയുണരുന്നു..
ചെപ്പിലുറക്കാനാവാത്ത
സ്വപ്നങ്ങളൊരുവരിക്കവിതയായ്
മാറിയിരിക്കുന്നു..
മനസ്സിനിപ്പോളൊരു വിലങ്ങില്ല
അതൊരു കടലേറും ശംഖുപോലെ.....

No comments:

Post a Comment