ചുമരുകളെത്രവേഗമാണിടിഞ്ഞുതകരുന്നത്

ചുമരുകളെത്രവേഗമാണിടിഞ്ഞുതകരുന്നത്
അതോടൊന്നിച്ചു മായുന്നു ചുമരെഴുത്തുകളും
പലേയിടത്തും ചോദ്യചിഹ്നങ്ങളുമായൊരു
ഭൂമിയരികിലേയ്ക്കണയുന്നുവല്ലോ...
കുലങ്ങളെയുയർത്തും
ഘടികാരസൂചിയിലുടക്കിവീണ
മൺതരികളോ ഈ പ്രപഞ്ചമെന്ന്
സംശയവും തോന്നിതുടങ്ങിയിരിക്കുന്നു
അറിയാതെയും പിന്നെയറിഞ്ഞും
വാതിൽപ്പടിയിൽ കാലം
കാവലിരിക്കുന്നതെന്തിനായോ??
വസന്തകാലപ്പൂക്കുടയിൽ
ഉടഞ്ഞ ചില്ലുഗോപുരച്ചീളുകൾ നിറയുന്നുവല്ലോ
മന്ത്രങ്ങളുടെ സുഗന്ധമുള്ള സന്ധ്യയിൽ
വിരൽതുമ്പിലെന്തേ വാക്കുകളുറങ്ങാതെയിരിക്കുന്നു
ചുമരുകളെത്രവേഗമാണിടിഞ്ഞുതകരുന്നത്
എന്നിട്ടുമെന്തേ ഹൃദ്സ്പന്ദനങ്ങൾ
വിരൽതുമ്പിലുറങ്ങാതെയിരിക്കുന്നു ...