ആകാശവീഥിയുടെ സർഗസ്വരമേ

ശ്വാസനിശ്വാസങ്ങൾക്കനുബന്ധമെഴുതി
കടഞ്ഞൊടുവിലിറ്റിച്ച കയ്പുനീരിലുമെഴുതിയിടും
ന്യായക്കോടതിയുടെ തുലാസിൻ തീർപ്പുകൾ
കാണുംനേരമിന്നെന്തുതോന്നുന്നുവെന്നാലോചിച്ചാൽ
അതിലൊരു തെറ്റുതൂക്കം
തൂങ്ങിയാടുന്നതു കാണാനായേക്കാം
പാതക്കിരുവശവുമായൊഴുകും
നിഴലുകൾക്കൊരേരൂപമുണ്ടാവേണ്ടതില്ലല്ലോ
കാലത്തിന്റെ എഴുതാക്കടങ്ങളെയൊക്കെ
എഴുതിസമമാക്കിയ
ഘടികാരസൂചികളിനിയെങ്കിലും
വിരലുകളിലൂടെയൊഴുകും
ഭൂഹൃദയസ്പന്ദനങ്ങളെ
തൂക്കിയളക്കാതിരുന്നുവെങ്കിൽ
അളക്കാനും വീതിക്കാനും
തൂക്കിവിൽക്കാനുമൊക്കെ
ആരാണാവോ ഇവർക്ക്
ചെങ്കോലുകളേകിയിട്ടുണ്ടാവുക
പലേ നാദോപകരണങ്ങളിലും
വിരൽ തൊടുമ്പോഴുണ്ടാവുന്ന
ആകാശവീഥിയുടെ സർഗസ്വരമേ
ഹൃദ്സ്പന്ദനങ്ങളിലുണരുക
ബാക്കിയുള്ള സ്പന്ദനങ്ങളെയെല്ലാമവർ
തൂക്കിയളന്നു വിൽക്കട്ടെ....
ഭൂമിയ്ക്ക് മുൾവിലങ്ങിട്ടവർ
കിരീടം വയ്ക്കാത്ത രാജാക്കന്മാരവർ
താഴ്വരകളിലവർ നിഴൽ മേയ്ക്കട്ടെ
സ്വരങ്ങളൊരു സർഗം തേടി
വിരൽതുമ്പിൽ കൂടുപണിയട്ടെ..