ഒരിയ്ക്കലെങ്ങോ

ഒരിയ്ക്കലെങ്ങോ
ഗ്രാമം പണിതീർത്ത
മൺകുടിലുകളിൽ മങ്ങിക്കത്തിയ
ചിമ്മിനിവിളക്കുകൾക്കരികിൽ
മിഴിനീരൊഴുക്കിയിരുന്നു
ദരിദ്രസങ്കടങ്ങൾ
അന്നും വൈദ്യതിദീപങ്ങളുടെ
മഹനീയാലങ്കരങ്ങളിൽ
നഗരമാഹ്ളാദിച്ചുകൊണ്ടേയിരുന്നു
ഇടയിലെവിടെയൊ
പകച്ചുനിന്നോരക്ഷരങ്ങൾ
ഗ്രാമദൈന്യത്തിനെ കൈവിരലാൽ
തൊട്ടറിഞ്ഞു
മുനയൊടിഞ്ഞ പേനതുമ്പിലൊഴുകി
മുറിവുകളിലെ രുധിരം
പിന്നെയെവിടെയോ യാത്രപോയ
നിമിഷങ്ങൾ മഞ്ഞുമലയിലുറഞ്ഞപ്പോൾ
മറന്നുവച്ച നിലവറയിലെ
പഴയോലക്കെട്ടിലെ
പുരാണങ്ങളിലൂടെ നടന്നു ഗ്രാമം
അപ്പോഴേയ്ക്കും ഗ്രാമപാതയിലും
വൈദ്യുതിയെത്തിയിരുന്നു
കുളിച്ചിറൻചൂടിയെത്തും പുലരിയിൽ
അക്ഷരങ്ങൾക്കരികിൽ നിന്നും
ചിമ്മിനിവിളക്കിൻ പുകയുമകന്നിരുന്നു..
നെൽപ്പാടത്തിനരികിലൂടെ
പവിഴമല്ലിപ്പൂവുകളിൽ
മഞ്ഞുതൂവിയ ശിശിരം
നടന്നു നീങ്ങിയ വഴിയിൽ
ഗ്രാമം അകിലും ചന്ദനക്കൂട്ടും
സുഗന്ധപാത്രങ്ങളിലേറ്റി
വീണ്ടും വിരൽതുമ്പിലൊരു
വിസ്മയതുണ്ടായുണർന്നു....