ചന്ദനമരങ്ങൾക്കരികിലൂടെ

എല്ലാറ്റിനുമവസാനമെന്നുറപ്പിക്കുമ്പോഴും
അവസാനിക്കാത്തതായി ഒന്നുണ്ടാവാം
എഴുതിമായ്ക്കാനാവാത്ത വാക്കുകളുടെ
ഹൃദ്സ്പന്ദനങ്ങളാവാമത്
നക്ഷത്രമിഴിയിലെ വെളിച്ചവുമായേക്കാമത്
ദൈവമൊരിക്കലുമൊരു കൽശിലയിലെ
കാഠിന്യമാവാനിടയില്ല
എല്ലാം കാണുകയും കേൾക്കുകയും
ചെയ്യുന്നുണ്ടാവാമാശിലക്കുള്ളിൽ
ഉറക്കം നടിച്ചിരിക്കുന്നൊരാൾ
കൈവിരലുകളിലൂടെയൊഴുകും
വാക്കുകളിലും
കടലിരമ്പത്തിലുമെല്ലാമൊഴുകും
മധുരതരമായ മന്ത്രണങ്ങളിൽ
കേൾക്കുന്നുണ്ടല്ലോ ഞാനാശിലയുടെ
ഹൃദയമിടിപ്പുകൾ
ചന്ദനമരങ്ങൾക്കരികിലൂടെ
നടക്കുമ്പോഴുള്ള സുഗന്ധം
കടലാസുപൂവുകളിൽ
നിന്നൊഴുകാത്തതെന്തേയെന്നോർത്തതിശയവുമില്ലയിന്ന്
ഓട്ടുവിളക്കുകളിലെ എള്ളെണ്ണത്തിരികളിൽ
നിന്നൊഴുകും പ്രകാശത്തിൽ
കാണാനാവുന്നുണ്ടല്ലോ
മിഴി തുറന്നുനോക്കും കൽശിലകളെ
അവിടെയാൾക്കൂട്ടത്തെ തേടിയല്ലല്ലോ
ഞാൻ ചെന്നത്
അതിനാലിനിയുമൊരു പ്രദർശനത്തിനു
ബാക്കിപത്രമെന്നോണം
കൽശിലകളെ കൈയേറാതിരുന്നാലും...
ദൈവങ്ങൾക്കിഷ്ടം
കുചേലങ്ങളിൽ കിഴികെട്ടിയെത്തും
ധർമ്മസങ്കടങ്ങളായിരിക്കും..
ഏകാന്തതയിൽ നിന്നാവുമതീവഹൃദ്യമാം
പ്രഭാതങ്ങളുണർന്നുവരിക......