Thursday, March 17, 2011

നക്ഷത്രമിഴികളിലെ വെളിച്ചം മായുന്നില്ലല്ലോ
എഴുതാൻ വൈകിയ
കഥപോലെയകന്നുനീങ്ങും
ദിനാന്ത്യങ്ങളിൽ
ചുമർചിത്രങ്ങളിൽ നിന്നിറങ്ങിവരുന്നു
പുരാണകാഥികർ
തിരക്കേറിയ ചിന്തകളിൽ
തീ കൊളുത്തിയതിൽ
നിറയും വിഭൂതിയിൽ
മുങ്ങിയ മായികക്കാഴ്ച്ചപോലെ
നിറം മങ്ങിപ്പോകുന്നു കഥകൾക്കും.
ഋതുക്കൾ നീർത്തിയിട്ട
വെയിൽനാളങ്ങൾക്കരികിലൊരു
മഴ പെയ്തിരുന്നുവെങ്കിൽ
പേടകങ്ങളിൽ ഭദ്രമായൊരുക്കി
സൂക്ഷിച്ചതൊക്കെ ചിന്നിചിതറുന്നു
കൈയാൽ തടുത്തുകൂട്ടി
വയ്ക്കാനാവാതെ ചുമരുകളിളകുന്നു
ചുറ്റിലുമൊഴുകുന്നതെന്തേ
കുടഞ്ഞിട്ട മൺപാത്രങ്ങൾ
പോലെ പലതും തകരുന്നുവല്ലേ
ശേഷിപ്പുകളിനിയെന്തു ബാക്കി..
അരികിലെ ദ്വീപിന്റെയാത്മകഥയിൽ
നിന്നൊഴുകുന്നു കണ്ണുനീർത്തുള്ളികൾ
അയൽരാജ്യത്തെ
കാഴ്ചകൾക്കെല്ലാമിന്നൊരു
ദു:സ്വപ്നത്തിന്റെ നിറം...
എങ്കിലും നക്ഷത്രമിഴികളിലെ
വെളിച്ചം മായുന്നില്ലല്ലോ....

No comments:

Post a Comment