വിരലുകളിലൊഴുകും ശരത്ക്കാലമേ

വിരലുകളിലൊഴുകും ശരത്ക്കാലമേ
നെയ്തെടുക്കുക
നക്ഷത്രങ്ങളെപ്പോൽ
മിന്നും സ്വപ്നങ്ങളെ
ആർഭാടക്കൂട്ടിലൊഴുകിയുടഞ്ഞുവീണ
അപരിചിതസായാഹ്നമേ
അരികിലെനിഴൽപ്പാടുകളെയുമെടുത്തുമായുക
ആർക്കോവേണ്ടിയൊരുക്കിയില്ലാണ്ടായ
പടിപ്പുരകളിലൊന്നിൽ
മുഖം നഷ്ടമായൊഴുകിയോരസ്തമയമേ
ഇനിയുമരങ്ങിലഭിനയിക്കുന്നുവോ
സന്ധ്യാവിളക്കുമായ്
രാവിനിടനാഴിയിലൂടെ
പകൽമുറ്റത്തേയ്ക്കൊഴുകും
സമുദ്രമേ
ശരത്ക്കാലവർണങ്ങൾ
ഭദ്രമായ് സൂക്ഷിക്കാനായ്
നിധിശേഖത്തിൽ നിന്നും
മുദ്രാങ്കിതങ്ങളില്ലാതെ
ഒരു ശംഖും കുറെയേറെ
കടൽചിപ്പികളും തരിക...