ആകാശനക്ഷത്രങ്ങൾ

മഞ്ഞുവീണൊരു ശിശിരത്തിൽ
മഹാഗണിയിൽ കടഞ്ഞ
പഴയനാലുകെട്ടുടച്ച്
മണ്ണും മണലും ചേർത്തതിൽ
ചിന്തേരിട്ട് വീണ്ടുമൊരുക്കുമ്പോൾ
പലേ പഴയകാലചിത്രങ്ങൾക്കും
കേടുപാടുകൾ വന്നു
ഉദാസീനമായി പണിചെയ്ത
കൽപ്പണിക്കാരെല്ലാമുടച്ചു
കുലശേഖരങ്ങളിൽ പരുക്കനേറ്റി
പിന്നെയതിനുമേലൊരു
സിമന്റുചാന്തുപൂശിയവർ
തിരികെ പോയപ്പോൾ
കാണാൻ ഭംഗിയുള്ളതൊന്നും
പഴയനാലുകെട്ടിലുണ്ടായിരുന്നില്ല
പവിഴമല്ലിപ്പൂവുകളിലൂടെ
നടന്ന ശിശിരം മറന്നിട്ടതൊരു
കൂട നിറയെ മഞ്ഞുകാലപ്പൂവുകൾ
ആ പൂവുകളിലുറങ്ങിയത്
നനുത്തകുളിർന്ന മഞ്ഞുതുള്ളികൾ...
വേനൽചൂടിൽ മാഞ്ഞൊരു
വേനൽമഴതുള്ളിയായ്
പുനർജനിച്ചേക്കാമാമഞ്ഞുതുള്ളികൾ
പഴയനാലുകെട്ടിനോർമ്മകളെ
ചരലിട്ടു മൂടിയ പണിക്കാരെല്ലാം
പിരിഞ്ഞ സായന്തനത്തിൽ
പവിഴമല്ലിച്ചോട്ടിലൊരു
കുടീരം പണിതു ഭൂമി
ആ കുടീരത്തിലിരുന്ന്
ആകാശത്തിൽ നക്ഷത്രങ്ങൾ
പൂക്കുന്നതു കണ്ടപ്പോൾ
ഒന്നറിയാനായി
ഉടയ്ക്കാനുമുടച്ചുവാർക്കാനുമേ
കൽപ്പണിക്കാർക്കാവൂ
ആകാശനക്ഷത്രങ്ങളെ
തെളിയിക്കാനവർക്കാവില്ല...