വിരൽതുമ്പിലെ ഗ്രാമം

ഒരിയ്ക്കലെങ്ങോ
വിരൽതുമ്പിൽ വിതുമ്പിയിരുന്നു
ഒരു ഗ്രാമം
നറും നിലാവിന്റെ ശിഖരങ്ങളിറുത്ത
അമാവാസിയിൽ
അറപ്പുരവാതിലിനരികിൽ
ചിന്തകളിലെയാരണ്യകത്തിനകലെ
മുദ്രവച്ച കടലാസുതുണ്ടുകളിൽ
നിന്നെത്രയോയകലെ
നന്ത്യാർവട്ടങ്ങൾ പൂക്കുന്ന
തൊടിയിലിരുന്നൊരു
പുസ്തകത്താളിലെ
എവിടേയ്ക്ക് പോകുന്നു പാതേയെന്നൊരു
കവിത ചൊല്ലിനടന്ന
കരാറുകളെഴുതിമുദ്രവയ്ക്കാനറിയാത്ത
ബാല്യകാലത്തിനരികിൽ
മഷിപ്പാടിലെ യുക്തിചിന്തപോൽ
അസത്യത്തിനിത്തിരി നിറം പൂശുന്ന
മധ്യാഹ്നസൂര്യന്റെ കനൽത്തീയിൽ
കരിയുന്നതിലകളോ, ശിശിരമോ
പുണ്യമോ???
ഹേമന്തത്തിന്റെ നടുത്തളത്തിൽ
ഉരകല്ലിലുരയുന്നത് ചന്ദനമോ
വാകയിലകളോ, നേരിയ സത്യത്തിന്റെ
പട്ടുനൂലിഴകളോ?.
ചുറ്റും മഞ്ഞുമൂടിയിരിക്കുന്നു
കാഴ്ച്ചക്കപ്പുറം ശിശിരമൊരു
ശീതകാലവസതിയിൽ
തീ കാഞ്ഞിരിക്കുന്നു...