തിരക്കേറിയ സായന്തനത്തിൽ

തിരക്കിലൊഴുകിമാഞ്ഞതൊരിടവേള
ഇടനാഴിയിലൂടെ തിരക്കിട്ടോടിപ്പോയതൊരു
സായാഹ്നം
ചിറകുകൾ തേടിയലഞ്ഞതൊരു
കുഞ്ഞാറ്റക്കിളി
നീർച്ചോലകളിലൊഴുകി മാഞ്ഞതൊരു
വസന്തകാലപൂവ്
പുഴയോരത്തെ കേതകിപ്പൂക്കളിറുത്തു
നീങ്ങിയത് കാലം
നിഴൽപെയ്തൊരനിശ്ചിതത്തിനരികിൽ
മുഖം താഴ്ത്തിയതൊരു കവിത
കൂടിയാട്ടക്കളരിയിൽ
മിഴാവ് കൊട്ടിയതൊരു ലോകം
മിഴിരണ്ടിലും സ്വപ്നങ്ങളുമായുണർന്നത്
നക്ഷത്രങ്ങൾ
മിന്നിയാടിയ തൂക്കുവിളക്കുകളിൽ
സന്ധ്യ നേദിച്ചത് വെളിച്ചം
ശിശിരം തൂവുന്നു ബലിക്കല്ലുകളിൽ
മഞ്ഞുനീർക്കുളിർ
മകരമഞ്ഞിൽ കുളിർന്ന
ഗ്രാമത്തിനരികിൽ
ഉത്സവസന്ധ്യയുടെ കൊടിയേറ്റം...