ഋതുക്കൾക്കും തിരക്കാണിപ്പോൾ

തിരക്കാണിപ്പോൾ
അശാന്തിയുടെ ആരവങ്ങൾക്കിടയിൽ
ഹൃദ്സ്പന്ദനങ്ങൾ നിരതെറ്റിയോടുന്നു
ഹൈറ്റിയിലെ ഭൂചലനത്തിനിടയിൽ
നിശ്ചലമായ ഹൃദയങ്ങളെയൊന്നും
നമുക്കറിയില്ല...
തിരക്കാണിപ്പോൾ
റിയൊ ഡി ജനേറിയോയിലൊഴുകിയ
മഴയുടെ രുദ്രതാണ്ഡവം
നമ്മെ അലട്ടുന്നില്ല
ബാലികലോവയിലെ വിശപ്പിന്റെ
വിളിയും മിഴിയീറനാക്കുന്നില്ല
തിരക്കാണിപ്പോൾ
നദീതീരത്തിലെ നഗരങ്ങളിൽ
നിന്നെന്നേയകന്നു നദീതടസംസ്ക്കാരം
അവിടെയിപ്പോൾ
സപ്തസാഗരത്തിനപ്പുറമൊരു
ലോകമെയ്ത അശാന്തിയുടെ
നിഴലുകൾ മേയുന്നു
ധർമ്മശാലകൾ കൈയേറുന്ന
വന്മതിലുകൾക്കരികിൽ
ആകാശമെവിടെയോ മാഞ്ഞു....
തിരക്കാണിപ്പോൾ
അശാന്തിയുടെ വിഹ്വലതകൾ...
തിരക്കൊഴിയുമ്പോഴേയ്ക്കും
ഒഴുകിപ്പോയ ഋതുക്കളിൽ
നിന്നടർന്നു വീണ ദിനരാത്രങ്ങൾ
സംവൽസരങ്ങളുടെ ധൂപപാത്രങ്ങളിൽ
പുകഞ്ഞില്ലാതെയായിട്ടുണ്ടാവും...
തിരക്കിനിടയിൽ
ശിശിരമെവിടേയ്ക്കോടിപ്പോകുന്നു
അരികിലെത്തി വിരൽതുമ്പിലിത്തിരി
മഞ്ഞു തൂവിയൊഴുകി മായുന്നു...
ഋതുക്കൾക്കും തിരക്കാണിപ്പോൾ....