ചെറിയ കവടിശംഖുകളിലൊതുങ്ങിയ ലോകം
വഴികൾക്കൊടുവിലെ
വഴിയിൽ ചിതയുമായിരുന്നു ഒരു ഋതു
വിധിരേഖകൾ തേടി നടക്കാത്ത
ഭൂമിയുടെ പ്രദക്ഷിണവഴിയിൽ
ആകാശ ഗംഗയൊഴുകിയ
വ്യോമവീഥികളിൽ
വിധിപർവങ്ങൾ ഗണിച്ചെഴുതിയ
ശംഖിനുള്ളിലൊതുങ്ങിയ
തീർഥമായ് ശിശിരമുറയുമ്പോൾ
വിധിചിത്രങ്ങളിൽ നിണം തൂവിയ
പുൽമേടുകളിൽ
ഉറങ്ങിപ്പോയതാരോ
ജീവന്റെ സ്പന്ദനമോ,
പകലിന്റെ നെടുവീർപ്പുകളോ,
ആത്മാവിനെ ചതുരക്കളങ്ങളിൽ
തൂക്കിയിടുന്ന കവടിശംഖുകളോ,
നക്ഷത്രങ്ങളുടെ ചലനങ്ങളിൽ
നിമിഷങ്ങളെണ്ണുന്ന
ചെറിയ കവടിശംഖുകളിലൊതുങ്ങിയ
ലോകമോ?
ലോകത്തിന്റെ അറിവില്ലായ്മയോ?
No comments:
Post a Comment