ജാലകവിരിയ്ക്കരികിൽ
ജാലകവിരിയ്ക്കരികിൽ
മഴക്കാറിൻ വിരിപ്പുമായെത്തിയ
പ്രഭാതത്തിനരികിൽ
സുവർണപ്പട്ടാൽ മൂടിയ
ആകൃതിയറിയാത്തോരുടെ
ആൾപ്പെരുമാറ്റം
ആവരണങ്ങളുടെ മർമ്മരം..
അനേകം ദിനങ്ങളുടെയിതളുകളിൽ
ഉണർന്നിരുന്ന അതേ അനക്കം..
ഉടഞ്ഞ മൺ തരികളിൽ വീണ 
ലോകത്തിനുത്ഭവത്തിൽ
പുറമേ പൊഴിയും പൂവുകൾ..
ജാലകപ്പടിയിൽ
ആകാശത്തിൽ നിന്നിറ്റുവീഴും
മഴതുള്ളികൾ...
പളുങ്കുമണികൾ പോൽ ചിതറും
മഴതുള്ളികൾക്കിടയിലൂടെ
അഴിക്കൂടുകളുടച്ച് 
പുറത്തേയ്ക്ക് നടക്കുന്നു
അയഥാർഥ്യം...
ജാലകത്തിലൂടെ
അകത്തേയ്ക്ക് വരുന്നു
പുറമെ പൊഴിയും പൂവിന്നൊരിതൾ..
അളന്നും തൂക്കിയും വെട്ടിയും
ചുരുക്കിയും അതിലാവുമോ
അയഥാർഥ്യങ്ങളുടെയഴിക്കൂടുകൾ
ആകൃതി നഷ്ടമായ
ഹൃദയത്തെയിനിയും വികലമാക്കുന്നത്
ജാലകവിരിപ്പാടിലേയ്ക്ക്
നടന്നുവരും ലോകമേ
മൺതരികളിൽ മഴപെയ്യുമ്പോൾ
അറിയാൻ ശ്രമിക്കാം
തിരുശേഷിപ്പുകളിലുണരും
അരുളപ്പാടുകളെ....