ഹൃദ്സ്പന്ദനങ്ങൾ
ഒരുനാൾദീർഘചതുരപ്പെട്ടിയിൽ
മഞ്ഞുപാളികളിൽ മൂടിയുറങ്ങും
ജീവൻ
മൗനത്തിന്റെ ശിശിരം
അതിനരികിൽ കേൾക്കും
നടന്നു നീങ്ങുന്നവരുടെ
പാദരക്ഷകളുടെ പ്രത്യേകശബ്ദം
ഉടയാടകളുലയുന്ന ശബ്ദം
ചിലപ്പോൾ ചിതയായിരിക്കും
അവിടെയുയരുക
അഗ്നിയിൽ പലതും തകരുന്ന
പ്രത്യേകശബ്ദം
മൺകുടങ്ങളുടയും
തീർഥജലമൊഴുകും
അന്നും ഇതുപോലെ
ഭൂമിയുടെ ശിരസ്സിലേയ്ക്ക്
അസ്ത്രവുമായി പിന്നിൽ
നിൽക്കുമോ നിഷാദമനസ്സുകൾ
അറിയില്ല
പാദരക്ഷകളുടെ
പതിതസ്വനങ്ങളിൽ
ഏതു സ്നേഹഗാഥയുടെ
അനുസ്വരങ്ങൾ
ഒന്നു മാറ്റി മറ്റൊന്ന്
അതിനരികിൽ വീണ്ടുമൊന്ന്
അങ്ങനെയങ്ങനെയെഴുതി
വിശേഷിപ്പിക്കുന്ന
ഋതുക്കളെ പോലെ മാറുന്ന
പശ്ചാത്തല ഗാനങ്ങളിൽ
മാഞ്ഞുപോകുന്നതാരോ
സന്ധ്യയുടെ സ്വർണ്ണവർങ്ങളിൽ
വസന്തവും, ഗ്രീഷ്മവും, വർഷവും
എങ്കിലും ശരത്ക്കാലത്തിൽ
സന്ധ്യ ഭൂമിയുടെ വർണ്ണമാകുന്നു....
No comments:
Post a Comment