Sunday, October 3, 2010

ഉൾക്കടൽ

മനസ്സിലെ ശംഖിലെത്രനാൾ
കടലെഴുതി ഉൾക്കടലിന്റെ
നിഗൂഢമൗനത്തിലുണർന്ന
കഥകൾ
കടൽത്തീരത്തൊഴുകിയ
മണൽത്തരികളുടെ
നിശ്വാസവിഹ്വലതകൾ
കടലിലൊഴുകിയ തോണികളിലെ
ആന്തലുകൾ
ചിറകുകളിൽ മഴക്കാർ വീഴ്ത്തിയ
രാത്രിയിലേയ്ക്ക് പറന്നകലുന്ന
മേഘങ്ങൾ
പാതയോരത്ത്
കൊടിതോരണങ്ങൾ ചാർത്തി
ആഘോഷിക്കപ്പെട്ട
നിസ്സഹകരണപ്രസ്ഥാനങ്ങളിൽ
ഉപേഷിക്കപ്പെട്ട ഒരു കടലാസ് താളിൽ
ഒരു യുഗപുരുഷന്റെ
ആത്മനൊമ്പരം പോലെയൊഴുകീ
സബർമതി
സന്ധ്യയുടെ അണിയാഭരണങ്ങൾ
കനലിലുരുകിയുരുകി
ശരറാന്തലുകളിലെ സ്വപ്നങ്ങളായി
മനസ്സിലെ ശംഖിൽ ആ സ്വപ്നങ്ങൾ
തൂവൽ പോലെ മൃദുവായ
അക്ഷരങ്ങൾ തേടി നടന്നു

No comments:

Post a Comment