ഹൃദ്സ്പന്ദനങ്ങൾ

ഇനിയുമെഴുതാമീമൺകൂനയ്ക്കരികിലായ്
ഇനിയും ജീർണ്ണിക്കാത്ത ഭാഗപത്രങ്ങൾ
തരം തിരിച്ചു ക്ഷമാശീലശിലകൾ തകർക്കുമാ
കനത്തമൗനത്തിനെയരിക്കാമരിപ്പയിൽ
കലക്കികുടിയ്ക്കാമീ സമുദ്രം വീണ്ടും
തിരതകർക്കും തീരങ്ങളിൽ മണൽച്ചോറുണ്ണാം
ബലിയൊരുക്കാം ത്രികാലങ്ങൾ
കാത്തുനിൽക്കുന്നു നേദ്യമൊരുക്കാം
കയ്പേറിയ കാഞ്ഞിരഫലങ്ങളാൽ
നിറയ്ക്കാം ഭണ്ഡാഗാരശൂന്യതയ്ക്കുള്ളിൽ
പഴേ വ്യസനങ്ങളെ വെള്ളിനാണയങ്ങളിൽ
തുടർക്കഥയിൽ തൂവാമൊരു തുളസീഗന്ധം
വിളക്കെടുക്കും നേരം പാടാം പദങ്ങൾ
പണ്ടേ നിഴൽ കുടങ്ങൾക്കുള്ളിൽ
മാഞ്ഞുമാഞ്ഞുപോയല്ലോ ദൈന്യം
തിരക്കിൽതിരയുന്നതാരെയീ കാലം
ഞാനോ തിരക്കിൽ തിരയുന്നു
ചന്ദനമരങ്ങളെ...