സ്മൃതിവിസ്മൃതിലയം

ചിരിക്കാൻ മറന്നുപോയെങ്കിലും
മിഴിക്കോണിലുടക്കിനിൽക്കുന്നീല
മിഴിനീർ
മൊഴിക്കുള്ളിലുടക്കിവലിക്കുന്നതുത്ഭവം
മഷിതുള്ളിപടർത്തിക്കളഞ്ഞതു
ഹൃദ്രരക്തമതിൽകൂടി തുളുമ്പിമറഞ്ഞത്
മൂകശോകങ്ങൾ; തീരാക്കടത്തിൽകുടുക്കിട്ടു
പോയതുപുഴ പിന്നെയൊതുക്കാൻ
കുരിശേറി വന്നതുകാലം
മേഘ ദൂതുകൾക്കുള്ളിൽ
മറഞ്ഞിരുന്നതൊരു ദു:ഖം 
മേഘ മാർഗത്തിൽ നിന്നും
ദിശമാറ്റിയതൊരുകടൽ
വഴിയിൽ മുൾവാകകൾവളരും നേരം
വഴി തിരിഞ്ഞു നടന്നതു ധരിത്രി
മനസ്സിന്റെ കടലിലൊഴുകിയതെന്റ
ഹൃദ് ലയം
ശംഖിലൊഴുകി നടന്നതെൻ
സ്മൃതിവിസ്മൃതിലയം...