മൂടൽമഞ്ഞിനരികിൽ നിന്ന്

നിന്നെക്കുറിച്ചോർത്ത്
മിഴിനീരൊഴുക്കണമെന്നൊന്നും
ഇന്നു നീയാവശ്യപ്പെടുകയില്ലെന്നറിയാം
അതിനാലിനിമുതൽ
മഞ്ഞുതൂവുന്ന ശിശിരത്തിനെക്കുറിച്ചെഴുതാം
മുന്നിൽ കാണുന്ന ലോകത്തെക്കുറിച്ചെഴുതിയാൽ
നാലുമടക്കിൽ മുന്നിൽ തുറക്കും
ഒരു കലഹകവാടം
അതിനിരുവശവും പശതേശൊട്ടിച്ച
കൃത്രിമത്വം നിറയും
താഴേയ്ക്കൊഴുകുന്ന നീർച്ചോലകൾ
കണ്ടുകണ്ടിരിക്കുന്ന ഭൂമി
അതിനാലിനി ശരത്ക്കാലവർണങ്ങളിൽ
മുക്കിയെഴുതാം..
ഭൂമിയ്ക്കായ്..
ഋതുക്കൾക്കായ്...
കടലിൽ നിന്നൊഴുകുന്ന ശംഖുകൾക്കായ്
ശിശിരത്തിൽ നിന്നു തുടങ്ങാം
മൂടൽമഞ്ഞിനരികിൽ നിന്നും....