ഡിസംബറിലെ മഞ്ഞുതുള്ളികൾ

വാതിൽപ്പാളികളിലൂടെ
മെല്ലെ അകത്തളത്തിലേയ്ക്കെത്തി
ഡിസംബറിലെ മഞ്ഞുതുള്ളികൾ
ക്ളാവുനിറഞ്ഞ് കരിന്തിരിപടർന്ന
ദിനാന്ത്യങ്ങളെ മറന്ന്
നിറഞ്ഞുകത്തിയ വിളക്കുകൾക്കരികിൽ
ചുറ്റിത്തിരിഞ്ഞു ജപമാലകൾ...
കടലിൽ വീണുടഞ്ഞ തീയിൽ
പിഴവുകളുടെ നിമിഷങ്ങൾ
അണുരൂപങ്ങളിലെ മാത്രയും
ത്രുടിയും തേടിയലഞ്ഞ
യന്ത്രക്കുരുക്കുകൾ
മനസ്സുകാണാനാവാതെ
പരീക്ഷണശാലയിൽ തപസ്സിരുന്നു
എഴുതിതീരാത്ത ഗ്രന്ഥങ്ങളായി മാറി
പകപോക്കിയ ജന്മവൈരുദ്ധ്യങ്ങൾ
നിറഞ്ഞ കലശക്കുടങ്ങളിലൂടെ
തുളസിപ്പൂവിന്റെ സുഗന്ധമൊഴുകി
മഞ്ഞുതൂവിയ മൺതരികളിലൂടെ
നടക്കുമ്പോൾ
ഡിസംബറെഴുതി
വർഷാന്ത്യക്കുറിപ്പുകൾ......