ഡിസംബറിലെ മൂടൽമഞ്ഞ്
കരിന്തിരി കത്തിയ
വിളക്കിനരികിൽ
കാത്തിരുന്നു കാലം
പൊഴിയുന്ന ഇലകളെ തേടി..
ഉലയുന്ന കടലിനെ തേടി...
മഷിപ്പാടുകളിൽ വിങ്ങിയ
മുറിവുണങ്ങി.
മായ്ച്ചിട്ടും മായ്ച്ചിട്ടും
മായാതെ നിന്നു കറുത്തപാടുകൾ,
പെയ്യാനാവാതെ ഘനീഭവിച്ച
കറുത്ത മേഘങ്ങൾ..
ഋതുക്കളുടെ ചരടിൽ
കോർത്ത നക്ഷത്രങ്ങളിൽ
മാർഗഴിയുണർന്നു..
ശിശിരം കടംകഥയിലെ
മഞ്ഞായി
മുൻപിലും പിന്നിലും
ഇലപൊഴിയിച്ചു നിമിഷങ്ങൾ
പൊഴിഞ്ഞു വീണ ഇലകളിരുന്നുറങ്ങി
രാത്രി..
ഡിസംബറിലെ മൂടൽമഞ്ഞിൽ
പ്രഭാതത്തിന്റെയോർമ്മപ്പാടുകൾ മാഞ്ഞു....
No comments:
Post a Comment