ഭാഗപത്രം
നൂറ്റാണ്ടുകൾ ഭാഗപത്രമെഴുതിയ
ചരിത്രക്കുറിപ്പുകളിൽ
യുദ്ധഭൂമിയിൽ മാഞ്ഞ സാമ്രാജ്യങ്ങൾ
ചെങ്കോലുകൾ താഴ്ത്തി നിന്നു
വെൺചാമരവും കുടയുമായ്
പരിചാരകർ കാവൽനിന്ന
രത്നസിംഹാസനങ്ങൾ
കാഴ്ച്ചവസ്തുക്കളായി മാറി
എവിടെയോ മാഞ്ഞ ഓർമക്കുറിപ്പുപോലെ
മഹാത്മാക്കൾ ആത്മാവു നഷ്ടമായ
പ്രതിമകളായ് പാതവക്കിൽ നിശ്ചലം നിന്നു
വിഷമവൃത്തങ്ങളിൽ വീണുടഞ്ഞ
ദിനരാത്രങ്ങൾ വീണ്ടും വീണ്ടും
ഓർമതെറ്റുകളാവർത്തിച്ചു
പലവഴിയിലൂടെ പിരിഞ്ഞുപോയ
നിമിഷങ്ങൾ തേടി പാതയോരത്ത്
കാലം തപസ്സിരുന്നു.......
No comments:
Post a Comment