ഡിസംബർ
വാകമരച്ചുവട്ടിലെ
കനൽത്തീ ഡിസംബറിനേകി
നവംബർ മെല്ലെ മഞ്ഞുപാളികളിലേയ്ക്ക്
മാഞ്ഞു
രുദ്രതീർത്ഥക്കുളത്തിനരികിൽ
കടലിലൊഴുകിയെത്തിയ
ശ്യാമശിലയിൽ നിന്നൊഴുകി
വാകച്ചാർത്തിൻ ഹരിതഭംഗി
ഞാനുണർന്ന ഡിസംബർ
ശിലാസ്നിഗ്ദതയിൽ
നിന്നുണർന്നവന്ന
ഒരു സ്വരം പോലെയൊഴുകി.. ...
മൂടൽമഞ്ഞിന്റെ നേരിയ ജാലകം
തുറന്നാകാശത്തേയ്ക്ക് മിഴിനട്ടിരുന്നു
പ്രഭാതം
ചന്ദനച്ചിതയിൽ
കാലം കടഞ്ഞു ചരിത്രം
എഴുതിയെഴുതിയലങ്കോലപ്പെട്ട
പൂഴിമണലിൽ നിറഞ്ഞു
അക്ഷരങ്ങളുടെ രംഗോലി
ചിത്രവൈചിത്ര്യം...
നവംബറിൽ നിന്നിറ്റുവീണ
മഞ്ഞുതുള്ളികൾ,
ദൈനംദിനക്കുറിപ്പുകൾ
മഞ്ഞിൽ മൂടി
യവനിക നീക്കിയരികിൽ വന്നു
ഡിസംബർ..
No comments:
Post a Comment