മൂടൽമഞ്ഞിനിടയിലെ ലോകം

കോപ്പർ ചിമ്മിനിയിലവർ
പൊരിച്ചെടുത്തു മുയൽക്കുട്ടികളെ
പുതുവൽസരാഘോഷം
കാറിന്റെ പിൻഗ്ളാസിലായ്
ഇനിയൊരു കൂട്ടർ പതിപ്പിച്ചു
ഒരു കടലാസ്തുണ്ട്
മിണ്ടാപ്രാണികളോടല്പം ദയയാവാം
രണ്ടിനുമിടയിലായൊഴുകിയ
കാറ്റിനരികിലൂടെ നടക്കുമ്പോൾ
മനസ്സു പറഞ്ഞു
എഴുതിയിടുക ഒരു വരിക്കവിത
കണ്ണുകളടച്ചിരുട്ടാക്കുന്ന
കാടുകൾക്കരികിൽ
നെരിപ്പോടുകൾക്കരികിലെ 
ശിശിരത്തിനായ്
മഞ്ഞുതുള്ളിയിൽ മുങ്ങിയുണരുന്ന
പുൽനാമ്പുകൾക്കായ്....
മൂടൽമഞ്ഞിനിടയിലെ
ലോകമൊരു പുകമറ
ഋതുക്കളങ്ങനെയല്ല
അവരൊന്നുമാരോടും യാചിക്കാറേയില്ല...
മഞ്ഞുതുള്ളികളെ പൂഴ്ത്തിവയ്ക്കാറുമില്ല
മനുഷ്യരങ്ങനെയല്ലല്ലോ
കോപ്പർചിമ്മിനിയിൽ പുകയുയരുന്നു
പരിസ്ഥിതിപാലകർ ചുറ്റിലും
പശതേച്ചൊട്ടിക്കുന്നു
പഴമയുടെ എഴുത്തോലകൾ...