മറയിട്ട മൂടൽമഞ്ഞിനരികിൽ

പായ് വഞ്ചി തുഴഞ്ഞകലെ
ഉൾക്കടലിലയുന്നതാരോ
പട്ടുപണസഞ്ചിയുമായ്
ഉപദ്വീപിലലയുന്നതാരോ
എഴുത്തുമഷിപ്പാടിനപ്പുറമൊരു
ലോകമില്ലെന്നെഴുതി നീട്ടുന്നതാരോ
സന്ധ്യയുടെ ചെപ്പിലെ തങ്കക്കിനാക്കളെ
ചില്ലുകൂടിലുടക്കുന്നതാരോ
ചേർത്തെഴുതുന്ന വിരലുകൾക്കരികിലൊരു
നിഴൽമരമായ് വളരുന്നാതാരോ
നിളയുടെ വറ്റിയുണങ്ങിയ
തീരത്തിനരികിലിരുന്നൊരു
തുളസിമണ്ഡപമുടച്ചതാരോ
മഞ്ഞുപാളികൾക്കടിയിൽ
മൗനം സത്യത്തെയൊരു
ചിമിഴിലൊളിക്കുന്നു
ചോദ്യങ്ങൾ വേണ്ടിനിയുമെന്ന്
കടൽ പറയുന്നു..
ചുറ്റുവലയങ്ങളിലെ മേഘങ്ങൾക്കെത്രനാൾ
മഴതുള്ളികളെ തടം കെട്ടി നിർത്താനാവും
തുള്ളിതുള്ളിയായ് മഞ്ഞു വീഴുന്നു
അമാവാസിയിലെയിരുട്ടിനരികിൽ
നിലാവു മാഞ്ഞിരിക്കുന്നു
മറയിട്ട മൂടൽമഞ്ഞിനരികിൽ
ജാലകവാതിലിനരികിൽ
നിയോൺ ദീപങ്ങളുടെ
പ്രകാശത്തിൽ
ശിശിരമുറങ്ങുന്നതു കണ്ടു....