തണൽ വേണ്ടിനിയും

മാഞ്ഞുതുടങ്ങിയിരിക്കുന്നു ശിശിരം
മഞ്ഞുകാലപ്പൂവുകളിറുത്തു
പാതയോരത്തിനരികിൽ
റാന്തൽവിളക്കുമായ്
നീങ്ങുന്നതാരോ???
നടന്നുനടന്നുവെളിച്ചം തേടിയൊടുവിലൊരു
ഗുഹയിൽ ശിലയായി മാറിയ
മൗനമിന്ന് കാലഭേദങ്ങളിൽ
കടംകഥ കോറിയിടുന്നു..
ഭൂവാതിലുകൾ തച്ചുടാഹ്ളാദിച്ച
ശൂന്യലോകവും കടന്ന്.
പൂക്കാലമായരികിൽ
വരുന്നതേതു സർഗം....
ഭൂമിയെകരിമഷിതേച്ചൊടുവിൽ മുഖമാകെ
കരുവാളിവച്ചതുമായ്ക്കാനിത്തിരികൂടി
ചായം തേച്ചഭിനയിക്കുന്നു
അണിയറയ്ക്കുള്ളിലെ ലോകം..
ഋതുക്കൾക്കെന്തിനൊരു തണൽ
തടുത്തു കൂട്ടിയാലാ തണൽകൂടകൾ
ഒരനുവാദവുമില്ലാതെയൊരു
നിഴൽപ്പാടായി മാറും....
അതിനാൽ തണൽ വേണ്ടിനിയും...