ചന്ദനസുഗന്ധം പൂശിയ വാക്കുകൾ

എഴുതാതിരിക്കുന്നതിലൊരർഥവുമില്ല
മിഴിയടച്ചിരുട്ടാക്കി
അനർഥങ്ങളിൽ നാനാർഥമെഴുതി
നീങ്ങിയേക്കാമൊരു ലോകം..
വിളക്കുകളെല്ലാം
കെടുത്തിയറയിലിരുന്നാൽ
താഴിട്ടുപൂട്ടി മുദ്രവച്ചൊരു ലോകം
മുന്നിലൂടെ നടന്നു പോകും...
അതിനാൽ
എഴുതാതിരിക്കുന്നതിലൊരർഥവുമില്ല.
പർണ്ണശാലകളിൽ മോക്ഷപ്രാപ്തിയായ
സത്യമെവിടെയന്ന് ചോദിച്ചലയേണ്ടതില്ലിവിടെ
മതിൽക്കെട്ടുകളിൽ തൂങ്ങിയാടുന്ന
പരസ്യപ്പലകയിലെ പകിട്ടു
കണ്ടാനന്ദിക്കാം..
പരവതാനിയിലൂടെയൊഴുകി നീങ്ങുന്ന
വിഹ്വലതകളേ
മനസ്സിനുള്ളിൽ നെരിപ്പോടു പുകയ്ക്കുന്ന
ചാതുര്യമേ..
ശിശിരകാലപുലരിയിൽ
ലഘുവായൊരാർദ്രഭാവമായ്
മഞ്ഞുതുള്ളികൾവീഴുമ്പോൾ
എന്തിനിങ്ങനെയൊരു
ജീവന്മരണപ്പോരാട്ടം
പ്രഭാവലയങ്ങൾ
അദൃശ്യരായ,എല്ലാമറിയുന്ന
ദൈവങ്ങൾക്കവകാശപ്പെട്ടത്..
എഴുതാതിരിക്കുന്നതിലൊരർഥവുമില്ല
ചാണക്കല്ലിലരയുന്ന ചന്ദനസുഗന്ധം
പൂശിയ വാക്കുകളിലൂടെയൊഴുകാമിനി..