ഋതുഭേദങ്ങൾ

ഇലപൊഴിയും കാലത്തിനരികിൽ
ഇടവഴിയിൽ പകച്ചുനിന്ന
നിമിഷത്തിനപ്പുറം
ഉലഞ്ഞു തിരിയുന്ന
ഭൂപടാതിർമറയിലൊരാരവം
കത്തുന്ന തെരുവോരങ്ങളിലാരൊക്കൊയോ
മാറ്റത്തിൻ ശംഖൊലി തേടുന്നു
ചുട്ടുകരിച്ച സമാധാനദൂതിന്റെ
ചാരക്കുടങ്ങളൊഴുകിയ
നീർച്ചാലിനരികിലുറയുന്നു ശിശിരം.
പാതയോരത്തോടിയ
പുരോഗമനതേർചക്രങ്ങളിൽ
വിങ്ങിയ മുക്കുറ്റിപ്പൂവുകൾക്കരികിൽ കണ്ടു
പടയോട്ടത്തിനിടയിൽ
വഴിയിലുപേക്ഷിച്ചു പോയ ഒരു മുഖം
നെടുമ്പുരയിലെ കൽതൂണുകളുലുയുന്ന
ആരവങ്ങൾക്കിടയിൽ
നിലം പൊത്തിയ
രാജമന്ദിരങ്ങൾക്കരികിലിരുന്ന്
കാലമേ അവശിഷ്ടങ്ങളിലെന്തു
തിരയുന്നു...
പുരാതനനഗരിയുടെ
പഴയകാലപ്രതാപമേ
അഗ്നിശലഭങ്ങളിൽ
നിന്നൊരുവരിക്കവിതയോ?
പ്രാചീനമായ
ചരിത്രാഖ്യാനരേഖകളോ
ചുറ്റിലും പൂക്കുന്ന മഞ്ഞുകാലപ്പൂവുകളിലെ
മഞ്ഞുതുള്ളികൾ മനസ്സിൽ വീഴുമ്പോൾ
ജാലകവിരിമാറ്റി കാണാമിനിയും
ഋതുഭേദങ്ങൾ...