ഋതുക്കൾക്കായൊരു സർഗം

ഇരുണ്ട്പുലർന്നപ്പോഴാണതാദ്യംകേട്ടത്
വിശ്വസിക്കാനായില്ല
പിന്നെ വിശ്വസിക്കാനായൊരു ശ്രമം
നൈലിനരികിലെ വിപ്ളവഗാനം പോലെ
വിസ്മൃതിയുടെ തുമ്പിലെ കടലാസ്പട്ടം
അതങ്ങ് പറന്നു പോയി
ഇടയിലുരുണ്ട് കൂടിയോരക്ഷരങ്ങൾ
വിരൽതുമ്പിൽ കൂടുകെട്ടി
അതിനവകാശികളുണ്ടായിരുന്നില്ല
പിന്നെയവകാശവാദം
പറഞ്ഞടർത്തിയെടുത്ത
ഭൂമിയുടെയരികിൽ കുറെപ്പേർ
കൊടിതോരണങ്ങളുമായ് യാത്രചെയ്തു
അതൊരു വിരസമായ
ആവർത്തനമായിരുന്നു..
അതിരുതിരിച്ചു കെട്ടിയ വേലിയ്ക്കൽ
വളർന്ന പാരിജാതങ്ങളിൽ
സന്ധ്യ പൂത്തുലഞ്ഞു...
തിരിഞ്ഞുനോക്കിയ നേരം
കാറ്റിലുലഞ്ഞുലഞ്ഞാ
കടലാസ് പട്ടം എവിടെയോ
മാഞ്ഞിരുന്നു...
പിന്നെ കടൽത്തീരത്തിരിക്കുമ്പോൾ
സന്ധ്യയുടെ പട്ടുചേലാഞ്ചലത്തിൽ
നക്ഷത്രങ്ങൾ നെയ്തെടുത്തു
ഋതുക്കൾക്കായൊരു സർഗം..