Friday, February 18, 2011

ശിശിരവുമെഴുതിയേക്കാം

പറന്നുയരുന്നുവല്ലോ ചുറ്റിലും
ഹോമപാത്രത്തിൽ
നിന്നെന്നപോലഗ്നികണങ്ങൾ....
മനാമയിലെ എതിരതിരുകളിൽ
ഹരിതമകുടങ്ങളുടെ ചുറ്റതിരുകളിൽ
എവിടെയൊക്കൊയോ
ഇരുമ്പുരുക്കിൽ തീർത്ത മതിലും 
ഭേദിച്ചൊഴുകുന്നു
അടക്കിയൊതുക്കിവിലങ്ങിട്ട
ആകുലതകൾ..
ശിശിരകാലചില്ലയിൽ കത്തിപ്പടർന്നാളി
നെരിപ്പോടിൽ പുകഞ്ഞയൽരാജ്യങ്ങളുടെ
ഹോമപ്പുരതേടിയൊടുവിൽ
തകർന്നടിഞ്ഞ ചില്ലുകൂടാരങ്ങളുടെ
അവശിഷ്ടങ്ങളുമായ്
ഒരു യുഗം നടന്നു നീങ്ങും...
കാലമോരോ യുഗത്തിനുവേണ്ടിയും
മനോഹരമായ
ചരിത്രസ്മാരകങ്ങൾ പണിതുയർത്തും..
അരികിലൊരു ശംഖിൽ
 ചുരുങ്ങിയതെന്തേ
ഹോമപ്പുരപ്പണിയുന്ന ലോകമോ
സാക്ഷിപത്രം തീർക്കുന്ന
വിൺതാരകങ്ങളോ??
നിരത്തും കടന്നെത്തുമുറഞ്ഞ
ശിശിരവുമെഴുതിയേക്കാം
ഹോമപ്പുരയിൽ പുകഞ്ഞില്ലാതെയാവും
ലോകത്തിന്നോർമ്മക്കുറിപ്പുകൾ
ഒരു സ്മരണാഞ്ജലി.....

2 comments:

  1. കാലമോരോ യുഗത്തിനുവേണ്ടിയും
    മനോഹരമായ
    ചരിത്രസ്മാരകങ്ങൾ പണിതുയർത്തും..
    അരികിലൊരു ശംഖിൽ
    ചുരുങ്ങിയതെന്തേ
    ഹോമപ്പുരപ്പണിയുന്ന ലോകമോ
    സാക്ഷിപത്രം തീർക്കുന്ന
    വിൺതാരകങ്ങളോ??...

    ഞാനിതിലെ ചിന്താധാരകള്‍..കാണുന്നു..
    നന്നായിരിയ്ക്കുന്നു.
    ആശംസകള്‍!!

    ReplyDelete
  2. ചിന്താ ശബളിമതയാര്‍ന്ന കവിത

    ReplyDelete