പ്രദക്ഷിണവഴികൾ
വഴിയിലെവിടെയോ വീണുടഞ്ഞ
ഒരു വാക്കിന്റെയുള്ളിലുടയാതെയുണർന്ന
അക്ഷരശ്രുതിയിൽ നിന്നും
ഉലയിലെ തീക്കനലിന്റെ
ശരത്ക്കാലമായി മാറിയ ഭൂമീ
പർവതശിഖരങ്ങളിൽ
തപസ്സു ചെയ്ത മൗനത്തിനപ്പുറം
ലോകം ചുരുങ്ങിയൊടുവിലൊതുങ്ങിയ
ചില്ലുകൂടിനുള്ളിലെ വെളിച്ചത്തിലേയ്ക്ക്
നടന്നു നീങ്ങിയ മനസ്സിൽ
പുണ്യാഹതീർഥമായ്
വീണ മഴതുള്ളികളിൽ
പുനർജനിച്ച ഓർമകളുടെ കുറിക്കൂട്ടുകൾ
ദശപുഷ്പങ്ങളായി വിടരുന്ന
കറുകനാമ്പിൽ, കൃഷ്ണക്രാന്തിയിൽ
സുഗന്ധമായൊഴുകുന്ന
സന്ധ്യാമന്ത്രങ്ങളിൽ
പ്രദക്ഷിണവഴിയിൽ
യുഗങ്ങളിൽ, യുഗാന്തരങ്ങളിൽ
സാഗരതീരങ്ങളിൽ
നക്ഷത്രവിളക്കുമായ്
ഭൂമീ
നമുക്ക് മെല്ലെ നടക്കാം....
No comments:
Post a Comment