മഴതുള്ളികൾ
ധ്യാനമണ്ഡപത്തിനരികിൽ
താളിയോലകളിൽ
നാരായത്തിലെഴുതിയ
നാമമന്ത്രങ്ങൾ ജപിച്ചു നിന്ന
പഴയ നാലുകെട്ടിലെ
നടുമുറ്റത്ത് പെയ്തൊഴുകിയ
മഴയെന്റെ മൗനത്തിൽ
വാക്കായുണർന്നു
ഹൃദ്സ്പന്ദനതാളമായ്
മഴയുണർന്നു വന്നപ്പോൾ
താമരയിലകളിൽ
വിണു നിറഞ്ഞ മഴ
മുത്തുമണികൾ പോലെ തിളങ്ങി
വയലിലും വരമ്പിലും
തുള്ളിതുള്ളിയെന്റെ മനസ്സിലും
വന്നു വീണു മഴതുള്ളികൾ
മനസ്സിൽ വീണ മഴയവിടെ
ഹിമകണം പോലെയുറഞ്ഞു
തീയാളിയ വേനൽക്കനൽ
മഴതുമ്പിലുലഞ്ഞു
നനുത്ത മഞ്ഞുതുള്ളിയായി
രുദ്രാക്ഷമെണ്ണിയിരുന്ന
ശിവക്ഷേത്രനടയിലൂടെയൊഴുകിയ
മഴതുള്ളികൾ കൃഷ്ണശിലയിലെ
ഓടക്കുഴലിനുള്ളിൽ
ഒരു സ്വരമായി മാഞ്ഞു.....
No comments:
Post a Comment