മഴതുള്ളികൾ

ചായങ്ങളെല്ലാം മഴയിലൊഴുകി
മാഞ്ഞപ്പോൾ
ഗ്രാമം പഴമയുടെ കൽപ്പടികളിലിരുന്ന്
ലോകഭൂപടം നിവർത്തി
സാമ്രാജ്യങ്ങളിലൂടെയൊഴുകിയ കടലിനും
ഗ്രാമാതിർത്തിയിലുണർന്ന ചക്രവാളത്തിനും
മാറ്റങ്ങൾ കാണാതെയത്ഭുതപ്പെട്ടിരിക്കുമ്പോൾ
മുത്തുകൾ പോലെ മഴതുള്ളികൾ
വീണ മുറ്റത്ത് നാൽക്കിലയിൽ
നിവേദ്യവുമായ് വന്ന രാത്രിശീവേലിമഴ
തീർഥക്കുളത്തിൽ മുങ്ങി
അരികിലിരുന്നു മെല്ലെ പറഞ്ഞു
അയൽരാജ്യങ്ങളുണർത്തുന്ന
അസ്വാസ്ഥ്യങ്ങളുടെ മാറാലകൾ മാറ്റി
താഴ്വാരങ്ങളുണർത്തുന്ന
സങ്കീർത്തനങ്ങളിലേയ്ക്ക്
മഴതുള്ളികളോടൊപ്പം
നമുക്ക് മെല്ലെ നടന്നു നീങ്ങാം