സ്വരം
ചക്രവാളത്തിനെ തൊട്ടുണർത്തിയ
കടലിനരികിൽ നീയുണർത്തിയ
മേഘഗർജ്ജനങ്ങളുടെ
അപസ്വരതാളത്തിനരികിൽ
എന്റെ മൃദംഗം സ്വരതാളമിടാൻ
വളരെയേറെ ശ്രമിച്ചു
പക്ഷെ നിനക്ക് പ്രിയം
അപസ്വരങ്ങൾ
നിന്റെ സ്തുതിപാലകർക്കും
ഗോപുരദ്വാരത്തിൽ
മഷിതുള്ളികളുമായ് നിൽക്കുന്ന
ദ്വാരപാലകർക്കും പ്രിയമത്
അത് കേട്ട് അപസ്വരങ്ങളുടെ
ആസ്ഥാനഗായകാ
നീയെന്തിനിങ്ങനെ
കോപിക്കുന്നു.
നിനക്കായ് അപസ്വരങ്ങളുടെ
ഒരു പ്രബന്ധം ഞാനെഴുതിയുണ്ടാക്കാം
ഒരു സമർപ്പണം
സന്തോഷിക്കുക
മഷിതുള്ളികളുടെ സ്ഥായീ ഭാവം
അതങ്ങനെ പ്രപഞ്ചാഘോഷമാവട്ടെ
ഗോപുരമുകളിലിരിക്കുമ്പോഴും
സ്വരസ്ഥാനം മാറിയ
രാഗഭാവം മാറിയ
അടിസ്ഥാനഭാവങ്ങൾ മാറിയ
ലയവും താളവും മാഞ്ഞ
മേഘഗർജ്ജനങ്ങളിലുണരുക നീ...
No comments:
Post a Comment