മഴതുള്ളികൾ

സ്നേഹമൊഴുകുന്ന
ഒരു വാക്കെഴുതാൻ
വിരൽതുമ്പിലിറ്റ് തേൻ
ഒരു ചിത്രശലഭത്തിന്റെ ചിറകിൽ
നിന്നെടുക്കാനൊരുങ്ങിയപ്പോൾ
ഹൈന്ദവക്ഷേത്രത്തിനരികിലൂടെ
ഭൂമിയുടെ അടഞ്ഞ വാതിൽ
തുറന്ന് ഒരു മീനലോചന
ഒരു തടാകം നിറയെ മഷിതുള്ളികൾ
കടലിലേയ്ക്കൊഴുക്കി
കടലതു കണ്ടൊന്നു ചിരിച്ചു
സ്നേഹിച്ചു തീരാത്തവരുടെ
കവിത വായിക്കാനിരുന്നാൽ
അവിടെയുമെത്തും
മഷിതുള്ളികൾ
മഷിതുള്ളികളൊഴുക്കിയ
രാസപരിണാമങ്ങളിൽ
ഭൂമിയാകെയുലയുമ്പോൾ
മഴയങ്ങനെ
പെയ്തുപെയ്തൊഴിയുന്നു
മഴതുള്ളികൾക്കെന്തു ഭംഗി
മഴയിലൂടെയൊഴുകി വരുന്ന
സ്വപ്നങ്ങൾക്കും
മഴയിലുണരുന്ന
കടലിനുമെന്തുഭംഗി...