നിമിഷങ്ങൾ
കാലത്തിന്റെ ഒരു തുണ്ടടർന്നുവീണ
പർവത ശിഖരത്തിലൂടെ
നടന്നു നീങ്ങിയ ഘടികാരസൂചികൾ
കാണാൻ മറന്ന താഴ്വാരങ്ങളിൽ
മഞ്ഞുതൂവി മഴയൊഴുകുമ്പോൾ
ആഷാഢം കാർമേഘങ്ങളിലുലഞ്ഞു
ഗ്രാമവീഥിയിലെ ചെമ്മൺപാതയിലൂടെ
നടന്ന ബാല്യം കാലിടറിവീണ
കളിമുറ്റത്തിരുന്നു പഴം പാട്ട് പാടിയ
പാണൻ മറന്നു വച്ച
മൺവീണയ്ക്കുള്ളിൽ
അവതാരങ്ങളുടെ അനന്തമൗനങ്ങൾ
മയങ്ങിക്കിടന്നു
നിമിഷങ്ങളുടെ ചെപ്പിനുള്ളിൽ
നിന്നും പുറത്തേയ്ക്കൊഴുകിയ
കടലിനരികിൽ കാലം
പ്രണവമുണരുന്ന ശംഖു തേടി...
No comments:
Post a Comment