കിളിത്തൂവലുകൾ



വൃക്ഷശിഖരങ്ങളിലെ കുളിരിലുണർന്ന
കാറ്റൊഴുകിയ വഴിയിൽ
ചില്ലുകൂടുകൾ നിരത്തി അവരിരുന്നു
വഴിയിലൂടെ പറന്നു നീങ്ങുന്ന
കിളിത്തൂവലുകളിൽ തീപടർത്തി
ചില്ലുകൂട്ടിലാക്കി
തീപടർന്ന ചിറകുകൾക്കുള്ളിലെ
ജീവസ്പന്ദനങ്ങൾ
ദിനാന്ത്യപ്പതിപ്പുകൾക്ക് തീറെഴുതി
മോടി കൂട്ടി നടന്നവർ
ഇടറി വീണപ്പോഴും ചില്ലുകൂട്ടിലേയ്ക്ക്
കല്ലെറിഞ്ഞാഹ്ളാദിച്ചവർ
മുനമ്പുകളിൽ അറ്റം കാണാത്ത
കടൽക്കരയിൽ
ഭൂമിയെ ചുറ്റിയൊതുക്കാൻ
ഭൂമിയുടെ ഭ്രമണപഥങ്ങളിൽ
കല്ലും മുള്ളും തൂവി അവർ കാത്തിരുന്നു
ചില്ലുകൂടുമായ്