സുവർണ്ണലിപികൾ
പുലർകാലങ്ങളിൽ പാടങ്ങൾക്കപ്പുറം
കുന്നിൻമുകളിലെ ആകാശം
സുവ്യക്തതയുടെ സുവർണ്ണലിപികളിൽ
എഴുതിയ വാക്കുകൾ സൂക്ഷിച്ച
കൽമണ്ഡപങ്ങളിലെ
സൗമ്യതയിൽ കാലമുടച്ച
മൺകുടങ്ങൾ ചിതറിവീണവഴിയിൽ
കാലിൽ മുള്ളുലഞ്ഞു വിതുമ്പിയ
രക്തകണങ്ങളിൽ
ഉറഞ്ഞുപോയ അന്തരാത്മാവിന്റെ
വേദനാരഹിതമായ നിസംഗതയിൽ
ഹിമകണങ്ങൾ വീണു മാഞ്ഞ
പുലർകാലവെളിച്ചത്തിന്നുറവിടം
തേടി ആൽത്തറയിലിരുന്ന വാക്കുകൾ
വേനൽക്കനൽ തുള്ളിയാടുന്ന
ആകാശത്തിനരികിൽ
പ്രകാശബിന്ദുക്കളിൽ
മിന്നിയാടുന്ന കസവുനൂലുകൾ
കൈയിലേറ്റി എഴുതാനിരുന്നു..
No comments:
Post a Comment