മഴതുള്ളികൾ

മഴ പെയ്തുകൊണ്ടേയിരിക്കുന്നു
മഴക്കാലങ്ങളിൽ
പാടം കടന്നു പാലം കയറി
ചരൽപ്പാതയിലൂടെ
വെയിൽനാളങ്ങൾ
പുസ്തകസഞ്ചിയിൽ തൂവി
ബാല്യം നടന്ന വഴിയിൽ
തണൽമരങ്ങൾക്കരികിലിരുന്ന്
പറഞ്ഞ പലകഥകളും മറന്നുപോയ
വളർന്നു വലുതായ ലോകത്തിൽ
തൂവൽ പോലെ പറന്നു പോയ
പഞ്ഞിതുണ്ടുകൾക്കൊപ്പം
ഒരു ചെറിയ കിളിയുടെ
തൂവലുമുണ്ടായിരുന്നു
കാലമൊഴുകിയ വഴിയിൽ
പാടം നികന്നു
പാലങ്ങൾ പുതിയ ചായങ്ങളിൽ
ഗ്രാമചിത്രങ്ങൾ മാറ്റിയെഴുതി
ഓർമചെപ്പിൽ പുസ്തകസഞ്ചിയുമായി
അസുഖകരമായ ഒരപരിചിത്വം
അരികിൽ വന്നിരുന്നു
മഴതുള്ളികളിൽ മാത്രം
പരിചിതമായ ഒരു കുളിരുണ്ടായിരുന്നു
അന്നും ഇന്നും....